Naibu Waziri Mkuu na Waziri wa Nishati, Dk. Doto Biteko, ametoa wito maalumu kwa wanamichezo wote nchini, hususan watumishi wa umma, kujenga utamadibu wa kufanya uchunguzi wa afya zao mara kwa mara ili kujihakikishia usalama wao wanaposhiriki michezoni. Akifungua rasmi mashindano ya 39 ya Shirikisho la Michezo ya Wizara na Idara za Serikali (SHIMIWI) jijini Mwanza, Dk. Biteko alisisitiza umuhimu wa vipimo vya moyo, damu na viungo vingine muhimu kabla ya kuingia viwanjani.
Katika hafla hiyo iliyofanyika jana, Septemba 7, 2025, kwenye Uwanja wa CCM Kirumba na kutanguliwa na maandamano ya kuvutia ya watumishi, Dk. Biteko alilitaka shirikisho la SHIMIWI kushirikiana na taasisi za afya ili kuweka utaratibu rasmi na endelevu wa upimaji afya kwa wanamichezo wote. Alisema, "Zaidi ya mazoezi na kujiandaa kiufundi, afya njema ndiyo msingi wa mafanikio. Ni lazima tuwalinde wanamichezo wetu."
Akizungumzia ukuaji wa michezo hiyo, Dk. Biteko alieleza kufurahishwa kwake na ongezeko la washiriki, kutoka watumishi 2,995 mwaka jana hadi 3,353 mwaka huu, ikiwa ni sawa na ukuaji wa asilimia 12. Alisema ongezeko hili ni ishara chanya inayoendana na ukuaji wa sekta nzima ya burudani na michezo nchini, ambayo mchango wake kwenye Pato la Taifa unaongezeka kwa kasi. Alitoa takwimu zikionesha sekta hiyo ilikua kwa asilimia 15 mwaka 2022/23 na inakadiriwa kukua kwa asilimia 18 mwaka 2023/24.
"Uwepo wa watumishi zaidi ya 3,000 hapa Mwanza sio tu unahamasisha michezo, bali unachochea mzunguko wa fedha na kutengeneza ajira za muda kwa wenyeji. Huu ni uthibitisho tosha kuwa michezo ni uchumi," alisisitiza Dk. Biteko.
Kwa upande wake, Katibu Mkuu wa Wizara ya Utamaduni, Sanaa na Michezo, Gerson Msigwa, alihakikishia kuwa wizara yake itasimamia mashindano hayo kwa haki na weledi, akimshukuru Rais Samia Suluhu Hassan kwa kutoa rasilimali zinazokuza sekta ya michezo.
Mashindano ya mwaka huu yanaongozwa na kaulimbiu, ‘Michezo kwa Watumishi Huongeza Tija Kazini, Jitokeze Kushiriki Uchaguzi Mkuu 29 Oktoba 2025 kwa Amani na Utulivu Kazi Iendelee’, na yanatarajiwa kufikia tamati Septemba 16, 2025.