Zanzibar inaendelea kufanya maajabu katika sekta ya elimu, huku takwimu mpya zikionesha mafanikio makubwa katika miaka minne ya utawala wa Rais Dkt. Hussein Ali Mwinyi. Takwimu hizo, zilizotolewa na Katibu Mkuu wa Wizara ya Elimu na Mafunzo ya Amali, Khamis Abdallah Said, zinathibitisha kuwa jitihada za serikali katika kuboresha elimu zimezaa matunda yanayoonekana.
Kwa mujibu wa Said, mafanikio haya yanatokana na uwekezaji mkubwa katika miundombinu ya elimu, ikiwemo ujenzi wa shule za kisasa. Katika kipindi hicho kifupi, serikali imefanikiwa kujenga madarasa 4,810 na shule za ghorofa 36, hatua iliyosaidia kupunguza msongamano wa wanafunzi madarasani na kuondoa mfumo wa zamani wa ‘mikondo miwili’ ambao ulikuwa unawakera wanafunzi wengi. Mafanikio haya yamepelekea kuongezeka kwa uandikishaji wa wanafunzi, ambapo elimu ya awali imefikia asilimia 84.4 mwaka 2024 kutoka asilimia 81.4 hapo awali, na elimu ya msingi imepanda kutoka asilimia 83.9 hadi asilimia 103.
Katibu huyo pia alieleza kuwa kati ya kila watoto 10, mmoja tu ndiye yuko nje ya mfumo wa elimu visiwani humo. Hili ni ongezeko kubwa na linaendana sambamba na takwimu nyingine zinazothibitisha kuwa asilimia 92 ya wakazi wa Zanzibar wanajua kusoma na kuandika. Hili ni jambo la kujivunia, kwani linaifanya Zanzibar kuwa na jamii iliyoelimika kwa kiwango kikubwa.
Katika upande wa teknolojia (TEHAMA), Zanzibar imepiga hatua kubwa na inajipambanua kuwa kinara barani Afrika. Kwa mujibu wa Katibu Mkuu huyo, Wizara ya Elimu imenunua zaidi ya kompyuta 300 pamoja na kompyuta mpakato 151 ambazo zimesambazwa katika shule zote za serikali. Alisema hatua hii imewezesha wanafunzi kujifunza kwa elimu masafa na kuongeza ubora wa elimu. Alisema, "Ukitoa Afrika Kusini, Zanzibar itakuwa inaongoza kwa vifaa vya TEHAMA katika shule za serikali. Hili halijawahi kutokea." Kauli hii inaonyesha jinsi serikali ya Zanzibar inavyojali maendeleo ya kiteknolojia katika sekta ya elimu.