Viongozi wa dini kutoka mikoa ya Kanda ya Kusini wameungana na kutoa wito kwa vijana wa Tanzania kuendelea kuwa walinzi wa amani ya Taifa, huku wakiwahimiza kujitokeza kwa wingi kupiga kura katika Uchaguzi Mkuu unaokaribia, Oktoba 29, 2025. Wameiasa jamii kuachana na taarifa za mitandaoni zinazolenga kuleta chuki au mifarakano.
Wito huu umetolewa leo, Oktoba 24, 2025, katika Kongamano la Amani lililofanyika mkoani Lindi, ambalo liliwaleta pamoja viongozi wa dini za Kikristo na Kiislamu kutoka mikoa ya Lindi, Mtwara na Ruvuma. Madhumuni ya kongamano hili yalikuwa ni kujadili kwa kina umuhimu wa kupiga kura, historia ya chaguzi za amani nchini, na wajibu wa kikatiba wa kila raia.
Sheikh Mkuu wa Mkoa wa Mtwara, Sheikh Jamaldin Chamwi, alitumia fursa hiyo kuwasihi wananchi wote kutumia haki yao ya kikatiba ya kupiga kura kwa utulivu na amani. Alibainisha kuwa Tanzania ni taifa la umoja na upendo na haitakubali kupoteza amani yake kwa sababu za kisiasa. "Kwa wale wanaopotosha ukweli mitandaoni na kutaka vurugu, tuna ujumbe mmoja: Tanzania sio wanayofikiria. Njia yetu ya kudhihirisha msimamo wetu kama taifa ni kujitokeza kwa wingi na kupiga kura," alisisitiza Sheikh Chamwi.
Akichangia mada, Mwakilishi wa Askofu wa Jimbo Katoliki la Lindi, Padri Bonavomtura Makota, alionesha imani kubwa kwa vijana. Aliwaasa vijana kupokea ushauri kutoka kwa wazee wao, huku akisisitiza umuhimu wa kuheshimu hekima ya wazee ili amani ya nchi iendelee kudumu.
Kwa upande wa uzoefu wa chaguzi zilizopita, Mchungaji Leonard John, ambaye ni Mwenyekiti wa Makanisa Wilaya ya Nachingwea, alikumbusha kwamba tangu nchi ipate uhuru haijawahi kutokea uvunjifu wa amani katika chaguzi zote. Hii inapaswa kuweka bayana kuwa utamaduni wa Watanzania ni kufanya uchaguzi kwa amani.
Abdallah Mpenda, Mwenyekiti wa vijana wa Baraza Kuu la Waislamu wa Tanzania (BAKWATA) Mkoa wa Ruvuma, alihimiza vijana wawe wenye kutafakari kwa kina kabla ya kuchukua maamuzi. "Tusifanye maamuzi kwa hisia za masikio bali kwa kuona kwa macho yetu. Tuangalie hali tuliyonayo sasa na tuwafikirie wale wenzetu ambao wamepoteza amani na utulivu wao. Je, tunaweza kumudu maafa wanayopitia wao?" alihoji Mpenda, akionya juu ya athari za kufuata chuki na hasira.
Viongozi wa dini kama Mchungaji Lussie Ngongi walisisitiza jukumu la kidini la kuhubiri amani, haki, na uhuru huku wakiwakumbusha wananchi kwamba "Hatuna nchi nyingine zaidi ya Tanzania," hivyo amani inahitaji kulindwa kwa gharama yoyote. Mussa Khamis, Katibu wa Jumuiya ya Vijana Mkoa wa Mtwara, alihitimisha kwa kusisitiza kuwa kupiga kura Oktoba 29 ndiyo njia bora ya kuchagua viongozi watakaosaidia kulinda amani na kuziba "upenyo wowote" unaoweza kutumiwa na wachache kuvuruga utulivu wa nchi.