Umoja wa Vijana wa Chama Cha Mapinduzi (UVCCM) Wilaya ya Shinyanga Mjini, umetoa shukrani zake kwa Rais Samia Suluhu Hassan kwa utekelezaji wa miradi ya maendeleo katika Kata ya Ibadakuli, wakisema kuwa ametimiza Ilani ya CCM kwa asilimia 100. Kiongozi wa UVCCM katika wilaya hiyo, Abdulaziz Sakala, alieleza kuridhishwa kwao na kazi kubwa iliyofanywa na Rais Samia, hasa mradi wa ujenzi wa Uwanja wa Ndege wa Shinyanga, ambao upo ndani ya kata hiyo.
Akizungumza wakati wa ziara ya 'UVCCM Mama Full Box Oparesheni' katika kata hiyo, Sakala alisema, "UVCCM wilaya ya Shinyanga Mjini, tumeridhishwa na kazi kubwa ambayo anaifanya Rais wetu Dk. Samia Suluhu Hassan ya utekelezaji wa Ilani ya CCM pamoja na kuwaletea maendeleo wananchi." Aliongeza kuwa kampeni hiyo ina lengo la kuhamasisha wananchi kujiandaa na uchaguzi mkuu wa mwaka 2025, na kuhakikisha Rais Samia anapata kura nyingi ili ashinde kwa kishindo.
Naibu Katalambula, Katibu wa UVCCM Wilaya ya Shinyanga Mjini, alisisitiza kuwa Rais Samia amefanya mambo makubwa nchini, ikiwa ni pamoja na kukamilisha miradi ya kimkakati iliyoanzishwa na Hayati Rais John Pombe Magufuli, kama vile uwanja wa ndege wa Ibadakuli. Alieleza kuwa uwanja huo ni kichocheo muhimu cha uchumi wa Mkoa wa Shinyanga na taifa kwa ujumla.
"Uwanja huu wa ndege utaongeza fursa za kiuchumi kwa wakazi wa Shinyanga, na kuboresha huduma za usafiri," alisema Katalambula. Aliongeza kuwa uboreshaji wa huduma za jamii katika Kata ya Ibadakuli ni matokeo ya juhudi za serikali ya awamu ya sita.
Katalambula pia aliwataka Watanzania kujiandaa kwa uchaguzi mkuu wa mwaka 2025, akisisitiza kuwa uchaguzi huo ni takwa la kikatiba na hauwezi kuzuiwa. "Ni muhimu kwa kila Mtanzania kushiriki katika uchaguzi huu ili kuendeleza demokrasia nchini," alisema.
Ziara hiyo ya UVCCM katika Kata za Ibadakuli na Kolandoto, ilikuwa na kauli mbiu "2025# Kazi na Utu,Tunasonga Mbele," ikiashiria azma ya chama hicho kuendelea kuwaletea maendeleo Watanzania.