Joto la kisiasa limepanda kwa kasi katika mkoa wa Singida, huku kukiwa na mzozo mkubwa ndani ya Chama Cha Mapinduzi (CCM) huku uchaguzi mkuu ukikaribia. Inaripotiwa kuwa baadhi ya wabunge wanaomaliza muda wao wameanza kuandika barua za malalamiko kwa viongozi wa juu wa chama, wakilalamikia wanachama wengine walioonyesha nia ya kuwania nafasi zao. Barua hizi zimefikishwa ngazi za mkoa na hata taifa, huku malalamiko makuu yakiwalenga wale wanaotaka kugombea pamoja na baadhi ya viongozi wa chama ngazi ya majimbo wanaodaiwa kuwashirikisha wapinzani.
Uchunguzi uliofanywa na Nipashe umebaini kuwa hoja kuu ya wabunge hawa ni madai kwamba wagombea wenzao wameanza kampeni mapema, kinyume na taratibu za chama. Aidha, wamewatupia lawama watendaji wa chama ndani ya majimbo yao kwa kushindwa kudhibiti “faulo” hizi. Hata hivyo, uchunguzi zaidi unaonyesha kuwa malalamiko haya huenda yanatokana na hofu kubwa iliyowakumba baadhi ya wabunge wa sasa, ambao hawana uhakika wa kurejea bungeni baada ya uchaguzi ujao. Kiongozi mmoja mwandamizi wa CCM, ambaye jina lake limelindwa, alieleza kusikitishwa na mwenendo huu akisema, “Kuna wabunge kila mara wanaandika barua tu kushtaki wenzao kwa viongozi wa juu kwa tuhuma ambazo kimsingi hazipo. Sijui hofu yao ni ipi. Wangojee mchakato uanze, na kama kuna mwanachama alikiuka utaratibu chama kipo macho.”
Hali inazidi kuwa tete katika majimbo kadhaa ya Singida, ambapo ushindani mkali unatarajiwa. Jimbo la Singida Mjini, ambalo linaongozwa na Mbunge Musa Sima, linatajwa kuwa na wagombea 15 waliojipanga kumkabili. Miongoni mwa majina yanayotajwa ni pamoja na Mkurugenzi wa Kijiji cha Nyuki, Philemon Kiemi; Mkurugenzi wa Kiwanda cha Pamba, Sajjad Haider; Meya wa Manispaa ya Singida, Yagi Kiaratu; na mkemia Japhar Said, ambaye ni Mkaguzi Mwandamizi wa Dawa kutoka Mamlaka ya Dawa na Vifaa Tiba (TMDA). Wengine wanaotarajiwa kuwania ni Charles Kisuke, Juma Kilimba (Mwenyekiti mstaafu wa CCM Mkoa wa Singida), Hassan Mazala, Halima Sadi, Martin Lissu, na Ibrahim Wawa.
Jimbo la Ilongero, linaloongozwa na Mbunge Ramadhani Ighondo, linaonekana kuwa na ushindani mkali zaidi, huku wanachama zaidi ya 20 wakidaiwa kujiandaa kupambana naye. Majina makubwa yanayotajwa ni pamoja na Waziri mstaafu wa Wizara ya Maliasili na Utalii, Lazaro Nyalandu; mfanyabiashara maarufu anayemiliki viwanda vya magodoro, Haidary Gulamali; na Maulid Sombi. Orodha hiyo inaendelea na Alfred Ringi, Japhet Mungwe, Mercy Mumbee, Abdallah Haji, Chrisogone Mangi, Hashim Ntandu, Gloria Nkungu, Musa Kuji, Juma Sima, Rehema Majii, Amani Nyekele, Huruma Kilakuno, Baraka Mussa, Sabasaba Manase, Juma Ng'imba, na Dk. Khalid Salla.
Jimbo la Singida Mashariki, ambalo linaongozwa na Miraji Mtaturu, nalo linatarajiwa kuwa na upinzani mkali. Thomas Mgonto, mfanyakazi katika Bandari ya Dar es Salaam, ametajwa kutaka kuwania jimbo hilo. Kinachovutia zaidi ni Nusrat Hanje, Mbunge wa Viti Maalum Mkoa wa Singida kupitia Chadema, ambaye ameshatangaza wazi nia yake ya kugombea jimbo hilo kupitia CCM.
Kule Manyoni, ambapo Dk. Pius Chaya ndiye mbunge wa sasa, Katibu Tawala Mstaafu wa Mkoa wa Singida, Doroth Mwaluko, anatajwa kulinyemelea jimbo hilo. Majina mengine yaliyotajwa ni Jamali Kuigwa na mbunge mstaafu wa jimbo hilo, Daniel Mtuka. Katika Iramba Mashariki, Mbunge Francis Mtinga anakabiliwa na upinzani mkali kutoka kwa Jesca Kishoa, ambaye ni Mbunge wa Viti Maalum Mkoa wa Singida kupitia Chadema aliyeshatangaza kujitoa Chadema na sasa anajiandaa kugombea kupitia CCM. Wengine wanaotajwa ni Mwenyekiti wa Halmashauri ya Wilaya ya Mkalama, James Mkwega, na kada mwingine Baraka.
Mwisho, Jimbo la Itigi linanyemelewa na Yohana Msita, Mjumbe wa Halmashauri Kuu ya CCM (MNEC), ambaye tayari ameshaandika barua ya kujiondoa kwa muda katika wadhifa wake ili aweze kuingia kwenye kinyang’anyiro cha ubunge kumkabili Mbunge wa sasa, Yahaya Masare. Hali hii inaashiria kuwa Uchaguzi Mkuu wa mwaka huu utakuwa na ushindani mkubwa, hasa ndani ya chama tawala, na ni wazi kuwa mbunge yeyote anayetaka kurudi bungeni atahitaji mikakati thabiti na kuungwa mkono na wananchi.