Mchakato wa kura za maoni ndani ya Chama Cha Mapinduzi (CCM) umetoa matokeo yaliyowashangaza wengi, huku vigogo na wanasiasa wakongwe wakijikuta wakitemwa na wanachama. Katika Mkoa wa Singida, kwa mfano, wabunge watano kati ya wanane waliohitimisha muda wao walipoteza nafasi zao. Hali kama hiyo imeshuhudiwa pia Dodoma, Dar es Salaam na Zanzibar, ambapo mawaziri, manaibu waziri na wabunge maarufu wameanguka.
Katika Mkoa wa Singida, waliopoteza viti vyao ni pamoja na Ramadhani Ighondo (Ilongero), Musa Sima (Singida Mjini), Miraji Mtaturu (Ikungi Mashariki), Francis Mtinga (Iramba Mashariki), na Yahaya Masare (Itigi). Hii inaonyesha dhahiri jinsi wapigakura wa CCM wanavyotaka mabadiliko na nyuso mpya za kuwatumikia. Waliofanikiwa kutetea nafasi zao ni Dk. Mwigulu Nchemba (Iramba Magharibi), Dk. Pius Chaya (Manyoni) na Elibariki Kingu (Ikungi Magharibi). Hili ni jambo la kupigiwa mfano, kwani inaonyesha kuwa uongozi bora na utendaji uliowazi hupata tuzo.
Mkoa wa Dodoma pia haukuachwa nyuma katika mabadiliko haya. Aliyekuwa Mbunge wa Kondoa Mjini, Ally Makoa, aliangushwa na Mariam Ditopile, jambo linalothibitisha kuwa wanachama hawako tayari tena kurudisha viongozi wale wale. Hata hivyo, baadhi ya vigogo wengine waliendelea kutamba, wakiwemo aliyekuwa Spika, Job Ndugai (Kongwa), na mawaziri Dk. Ashatu Kijaji (Kondoa) na Anthony Mavunde (Mtumba), ambao wote walishinda kwa kishindo.
Katika Jiji la Dar es Salaam, mabadiliko yamekuwa makubwa. Katika Jimbo la Temeke, Mariam Kisangi alimshinda mwanahabari maarufu Shafi Dauda na wanasiasa wengine kadhaa. Jimbo la Mbagala lilishuhudia Kakulu Kakulu akimwangusha aliyekuwa mbunge, Issa Mangungu. Katika Kibamba, Angela Kairuki aliibuka mshindi na kumshinda aliyekuwa mbunge Issa Mtemvu. Matokeo haya yanaashiria mabadiliko makubwa ya kisiasa ndani ya chama tawala, yakitoa ujumbe kuwa hakuna anayejivunia kiti cha kudumu bila kutenda kazi.
Huko Zanzibar, hali haikuwa tofauti. Mawaziri kadhaa, manaibu waziri, na viongozi waandamizi walishindwa katika kura za maoni. Miongoni mwao ni Waziri wa Kilimo Shamata Shaame Khamis na Naibu Waziri wa Fedha Juma Makungu. Hii ni dhihirisho kwamba wanachama wa CCM Zanzibar wameamua kufanya tathmini ya utendaji wa viongozi wao na kuwapa nafasi wale wanaowaamini.
Hali hii ya kupigwa teke kwa baadhi ya viongozi inaashiria mambo mawili muhimu: kwanza, wananchi wameelimika na sasa wanachagua viongozi kwa kuzingatia utendaji wao na sio kwa majina makubwa. Pili, inaonyesha kuwa hakuna kiti cha uongozi kinachorithiwa. Kila kiongozi anahitaji kujituma kwa bidii ili kuendelea kupata imani ya wapigakura wake.