Wakulima na wafugaji katika vijiji vitatu vya Halmashauri ya Wilaya ya Singida wamepongeza hatua ya Serikali ya kufunga viwanda vya kuchinja punda katika mikoa ya Dodoma na Shinyanga, wakisema hatua hiyo imeokoa punda kutokomea. Wakizungumza kwenye maadhimisho ya miaka sita ya utekelezaji wa mradi wa ustawi wa punda, wananchi hao kutoka vijiji vya Kinyamwenda, Ghata, na Endeshi walieleza kuwa, kutokana na uzazi mdogo wa punda, biashara ya ngozi ingesababisha wanyama hao kutoweka kabisa nchini.
Katibu wa Kikundi cha Ukombozi cha Kijiji cha Kinyamwenda, John Mwiru, alisema lengo la maadhimisho hayo ni kupaza sauti za utetezi wa punda na kutoa elimu kwa jamii nzima kuhusu umuhimu wa kuwatunza wanyama hawa. Alisema kuwa mradi huo, unaotekelezwa na Shirika la INADES Formation Tanzania (IFTz), umesaidia kupunguza vitendo vya ukatili kama vile kuwapandisha mizigo mizito kupita kiasi, na umechangia pakubwa katika kuanzisha vilabu vya utetezi wa punda mashuleni na kuboresha afya zao.
Akitoa ufafanuzi zaidi, Mkuu wa Idara ya Mafunzo wa IFTz, Jackline Nicodemas, alisema shirika hilo kwa kushirikiana na Wizara ya Mifugo na wadau wengine walifanya utafiti mwaka 2019 uliobaini kuwa biashara ya ngozi ya punda ilikuwa inashamiri sana na kusababisha wizi wa punda. Alisema ukiukwaji mkubwa wa masharti ya mikataba iliyopewa wawekezaji, ambapo walikuwa wakichinja punda wengi kupita kiasi kila siku, ndio uliisukuma Serikali kufunga viwanda hivyo. Hatua hiyo ilifuatiwa na tamko la wakuu wa nchi lililotolewa Dar es Salaam mwaka 2021, likisitisha biashara ya punda na ngozi nchini kwa miaka 15 hadi pale idadi ya punda itakapofikia milioni 10.
Nicodemas aliongeza kuwa, kwa sasa Serikali inafanya utaratibu wa kutengeneza kanuni itakayokataza punda kutumika kama chakula, kwani kuna baadhi ya jamii bado zina desturi ya kuwala. Alisema juhudi hizi zimeleta matumaini makubwa na kwamba jamii sasa imekuwa na uelewa mpana zaidi kuhusu mchango wa punda katika uchumi na wanathamini wanyama hao.
Naye Kaimu Mkurugenzi Mtendaji wa Halmashauri ya Wilaya ya Singida, Christopher Kidubo, aliyekuwa mgeni rasmi, aliahidi kuwa halmashauri hiyo itahakikisha inasimamia sheria ya ustawi wa wanyama, Sura Namba 154 ya 2023, inayotambua haki za punda. Alisema halmashauri itatumia wataalam wake kutoa mafunzo kwa wananchi juu ya matumizi bora ya vifaa vya kubebea mizigo kama vile toki na matandiko, ili kuepusha majeraha kwa punda. Pia, aliahidi kutumia mafunzo hayo yaliyotolewa kwa wakazi wa vijiji hivyo vitatu kueneza elimu katika vijiji vingine vyote vya wilaya ili kuhakikisha punda wanapata ustawi unaostahili.