Serikali ya Tanzania imetoa onyo kali kwa wagombea mbalimbali wanaowania nafasi katika Uchaguzi Mkuu ujao, ikiwakemea vikali dhidi ya tabia ya kuwarubuni wananchi kwa ahadi za kuondoa mifumo ya ununuzi wa mazao kwa njia ya stakabadhi ghalani na minada ya kidijitali. Onyo hili linakuja kufuatia madai ya baadhi ya wagombea kuwa mifumo hiyo ni mzigo kwa wakulima, jambo ambalo Waziri wa Kilimo, Hussein Bashe, amelikemea vikali.
Akizungumza kwa msisitizo, Waziri Bashe alimuomba Rais Samia Suluhu Hassan kuingilia kati na kukemea tabia hii, akieleza kuwa mifumo hiyo haijabuniwa kwa lengo la kuwaumiza wakulima, bali ni kwa ajili ya kuwasaidia na kukuza uchumi wa taifa. "Naomba wananchi wasikubali kurubunika na ahadi hizo za uongo. Rais, tunaomba utusaidie kukemea hili kwa sababu mifumo hii ina manufaa makubwa kwa serikali na wananchi kwa ujumla," alisema Bashe.
Waziri Bashe alifafanua kuwa mifumo ya stakabadhi ghalani na minada ya kidijitali inaleta faida nyingi. Kwa serikali, inarahisisha ukusanyaji wa mapato na kuiwezesha Mamlaka ya Mapato Tanzania (TRA) kuwa na takwimu sahihi za ununuzi wa mazao. Kwa upande wa wakulima, mifumo hii inahakikisha wanapata vipimo sahihi na bei zinazostahili kwa mazao yao, na hivyo kupunguza uwezekano wa kutapeliwa. Alibainisha kuwa baadhi ya wagombea wanapinga mifumo hii kwa lengo la kukwepa kodi, jambo linaloathiri maendeleo ya sekta ya kilimo na kuwanyima wakulima haki zao.
Serikali Yatoa Ahadi kwa Wakulima
Katika hatua nyingine, Waziri Bashe aliwatoa hofu wakulima kuhusu soko la mazao yao. Kuhusu zao la mahindi, alisema serikali imepanga kuzalisha tani milioni 10 mwaka huu na kuwahakikishia wakulima kuwa hakuna mahindi yatakayo haribika au kukosa soko. "Serikali itaendelea kununua mazao yao," alisisitiza.
Kuhusu suala la mbaazi, ambapo bei imeshuka hivi karibuni, Waziri Bashe alisema serikali imeanza mazungumzo na Serikali ya India ili kutafuta soko la kudumu. Aliongeza kuwa bei ya mbaazi imepanda kutoka TZS 200 hadi TZS 1,200 kwa kilo, akitoa rai kwa wakulima waendelee kulima kwa bidii na kuwa watulivu kwani serikali iko pamoja nao. Alihitimisha kwa kusema kuwa serikali inataka kilimo chenye tija na masoko ya uhakika, na imejipanga kikamilifu kufanikisha hilo.