Serikali imeipongeza kwa dhati kazi kubwa iliyofanywa na Baraza la Ushauri la Taifa kwa Watu wenye Ulemavu, ambalo limemaliza muda wake wa miaka mitatu (2022–2025) likiacha alama ya mafanikio makubwa katika kuboresha ustawi wa kundi hilo nchini. Akizungumza jijini Dodoma mnamo Septemba 18, 2025, Katibu Mkuu wa Ofisi ya Waziri Mkuu anayeshughulikia Kazi, Vijana, Ajira na Wenye Ulemavu, Mary Maganga, alisema mchango wa baraza hilo umekuwa chachu muhimu katika ajenda ya maendeleo jumuishi.
Maganga alibainisha kuwa katika kipindi chake, baraza hilo limefanikisha kuandaa nyaraka tano muhimu za kisera ambazo sasa ni nguzo imara katika kulinda haki na maslahi ya watu wenye ulemavu. Miongoni mwa mafanikio hayo ni pamoja na kukamilika kwa Mwongozo wa Uratibu wa Vyama vyao, Mkakati wa Taifa wa Teknolojia Saidizi utakaorahisisha upatikanaji wa vifaa muhimu, na Mpango maalum wa Taifa wa Haki na Ustawi wa Watu wenye Ualbino.
Vilevile, alitaja kukamilika kwa Mwongozo wa Mfuko wa Taifa wa Watu wenye Ulemavu ambao utaweka utaratibu mzuri wa usimamizi wa fedha zao, pamoja na Mwongozo wa Viwango vya Ufikivu utakaohakikisha majengo na miundombinu inazingatia mahitaji yao. "Juhudi hizi zimeleta mafanikio dhahiri katika ajenda ya usawa, ushirikishwaji, na ulinzi wa haki za watu wenye ulemavu," alisema Maganga.
Kwa upande wake, Mwenyekiti wa Baraza hilo lililomaliza muda wake, Dk. Lukas Kija, aliishukuru serikali kwa ushirikiano mkubwa. Alipongeza hatua za serikali za kutoa ruzuku kwa vyama vya watu wenye ulemavu, kusambaza vifaa saidizi muhimu, na hasa kuzindua mfumo wa kisasa wa kanzi data ya watu wenye ulemavu, ambao utarahisisha upangaji wa mipango ya maendeleo inayowalenga.