Wakati Tanzania Bara na Zanzibar zinapoelekea katika uchaguzi mkuu, hewa imejaa matarajio na hofu kidogo. Huu si wakati wa kupima nguvu za kisiasa tu, bali ni kipimo cha ukomavu wa taifa letu: je, tunaweza kushindana kwa hoja bila kuraruana? Msimu huu, viongozi wakuu wameweka mezani nguzo mbili muhimu; Rais Hussein Mwinyi amesisitiza umuhimu wa kulinda amani, huku Makamu wa Kwanza wa Rais, Othman Masoud Othman, akikumbusha wajibu wa kutenda haki. Hizi si fikra hasimu, bali ni pande mbili za shilingi moja ambayo mustakabali wa nchi unategemea.
Historia ya dunia inatupa mafunzo muhimu kuhusu hatari ya kuegemea upande mmoja. Taifa linalokumbatia amani ya kimyakimya bila kushughulikia kero za haki, linajenga bomu la wakati. Mfano ni Misri kabla ya mwaka 2011, ambapo utulivu wa juu ulificha hasira za wananchi walionyimwa fursa na haki, na kusababisha mlipuko wa kijamii. Kwa upande mwingine, kudai haki kwa njia za fujo na vurugu husababisha maafa yasiyo na mshindi. Libya baada ya 2011 ni ushahidi mchungu ambapo harakati za mabadiliko ziliiacha nchi vipande vipande, ikikosa amani na hiyo haki iliyokuwa ikitafutwa.
Hata hivyo, dunia imejaa mifano ya mataifa yaliyoonyesha hekima. Afrika Kusini chini ya Nelson Mandela ilichagua njia ya maridhiano, ikitafuta haki kwa waathirika wa ubaguzi wa rangi huku ikihubiri amani na msamaha ili kuepuka kulipiza kisasi. Vilevile, Ghana imejijengea heshima barani Afrika kwa kuendesha siasa za kidemokrasia na chaguzi za amani tangu mwaka 1992. Mifano hii inathibitisha kuwa inawezekana kutofautiana vikali kisiasa lakini bado tukaweka maslahi ya taifa mbele.
Tanzania nayo ina hazina yake ya maridhiano. Mwaka 2009, Zanzibar ilivunja mkwamo wa kisiasa kupitia makubaliano kati ya Rais Amani Karume na Maalim Seif, yaliyozaa Serikali ya Umoja wa Kitaifa. Hivi karibuni, Rais Samia Suluhu Hassan alianza mchakato wa mazungumzo na viongozi wa upinzani. Ingawa safari hii ina changamoto zake, inaonesha kuwa moyo wa maridhiano upo ndani ya damu yetu. Sasa, wajibu wetu ni kuufanya moyo huo uongoze kampeni zetu.
Tunawaomba wanasiasa na wananchi wote; tufanye majukwaa ya kampeni kuwa darasa la sera, si viwanja vya matusi. Tujadili jinsi ya kukuza uchumi, kuunda ajira, kuboresha afya na elimu, badala ya kushambuliana binafsi. Tofauti za kiitikadi si uadui, bali ni utajiri wa mawazo. Kama vidole vya mkono mmoja ambavyo havilingani lakini hufanya kazi pamoja, utofauti wetu wa kisiasa unapaswa kuwa nguvu ya kujenga taifa imara. Uchaguzi huu uwe alama ya historia, ambapo Watanzania walichagua hekima badala ya hasira, na umoja badala ya utengano, tukijenga taifa lenye amani, haki, na maendeleo kwa wote.