Mgombea urais wa Zanzibar akisimama chini ya mwavuli wa Chama cha Wakulima (AAFP), Ndugu Said Soud Said, ametoa wito mzito kwa Watanzania wote kuendeleza juhudi za kuhifadhi na kuhubiri amani katika kipindi chote cha uchaguzi mkuu unaotarajiwa kufanyika hivi karibuni, Oktoba 29 mwaka huu.
Akiongea na waandishi wa habari katika ofisi yake huko Wawi, Mkoa wa Kusini Pemba, Said alisisitiza kwamba amani si jambo la kupewa, bali ni tunu inayoihitaji kutunzwa kwa makini sana. Alitoa msisitizo maalum kwa wananchi kukataa kabisa wito wowote wa maandamano au vitendo vinavyoweza kuhatarisha usalama wa nchi. Mgombea huyo ameeleza kwamba vitendo vya vurugu na maandamano havileti tija yoyote kwa taifa na badala yake vinaweza kusababisha maafa makubwa na kurudisha nyuma maendeleo tuliyoyapata kwa miaka mingi.
"Tanzania inajulikana duniani kote kama nchi ya amani. Ni jukumu letu sote, bila kujali tofauti za kisiasa, kuendeleza amani hii kwa ajili ya manufaa ya vizazi vyetu na taifa kwa ujumla," alisema Said. Aidha, amesisitiza kwamba serikali na vyombo vya usalama vinapaswa kuchukua hatua kali za kisheria dhidi ya mtu yeyote atakayethubutu kuvuruga au kuhatarisha amani iliyopo.
Mgombea huyo wa AAFP alikumbusha Watanzania umuhimu wa kujifunza kutokana na yale yaliyotokea katika mataifa mengine ambayo yalikumbwa na migogoro na machafuko makali kutokana na migogoro ya kisiasa. Alivitaja nchi kama Libya na Tunisia ambazo, licha ya miaka kupita, bado zinaendelea kupambana na madhara ya machafuko hayo, ikiwemo kudorora kwa uchumi na kupotea kwa maisha ya watu wasio na hatia.
"Ni somu tosha kwetu kwamba amani ikishapotea, kuirejesha ni kazi ngumu sana, na inaweza kuchukua miaka mingi sana," aliongeza. Hivyo, aliwataka wananchi wawe na subira, hekima na umoja katika kipindi hiki nyeti cha uchaguzi.
Akihitimisha, Said Soud Said aliahidi kwamba Chama chake cha AAFP kitaendeleza mkakati wa kusimamia siasa za upendo na maridhiano, akilenga kuhakikisha kwamba Tanzania inasalia kuwa mfano bora wa demokrasia yenye amani na utulivu barani Afrika na duniani kwa ujumla.