Akitangaza dira yake ya kiuchumi endapo atachaguliwa, mgombea urais kupitia Chama cha Ukombozi wa Umma (CHAUMMA), Salum Mwalimu, ameweka bayana kuwa atatumia Kituo cha Ubia kati ya Sekta ya Umma na Binafsi (PPP) kama injini kuu ya mapinduzi ya miradi ya maendeleo nchini. Akizungumza na umati wa wananchi wilayani Muleba, mkoani Kagera, Mwalimu alituma salamu za moja kwa moja kwa Mkurugenzi wa kituo hicho, David Kafulila, akimtaka ajiandae kwa mabadiliko makubwa.
Mgombea huyo aliahidi kwamba, iwapo Watanzania watampa dhamana ya kuiongoza nchi, serikali yake itaweka mtaji mkubwa na wa kutosha ndani ya Kituo cha PPP ili kifanye kazi kama chombo kikuu cha uwekezaji cha taifa. Alisisitiza kuwa mfumo huu utawezesha utekelezaji wa miradi mikubwa itakayochochea ukuaji wa uchumi na kuboresha huduma za msingi kwa wananchi bila kutegemea mifumo ya kawaida ya kibajeti pekee.
"Rafiki yangu David Kafulila anayekiongoza Kituo cha PPP ajiandae. Serikali yangu itakitumia kituo hiki katika mambo yote ya msingi ya taifa letu. Tutaweka fedha za kutosha kuhakikisha huduma zote za kibinadamu na miradi ya uzalishaji inatekelezwa kwa kasi," alisema Mwalimu huku akishangiliwa.
Kama mfano halisi, aliahidi kuleta mapinduzi katika usafirishaji kwenye Ziwa Victoria kwa kuanzisha huduma za boti za mwendo kasi, mradi ambao alidai utatekelezwa kupitia mfumo huo wa PPP ili kurahisisha usafirishaji wa abiria na mizigo kwa wakazi wa Kanda ya Ziwa.
Aidha, Salum Mwalimu aligusia suala la ardhi na hifadhi, akiahidi kusitisha mara moja upanuzi wote wa maeneo ya hifadhi za taifa na mapori ya akiba. Alisema hatua hiyo itadumu hadi pale serikali yake itakapojiridhisha kuwa mahitaji ya msingi ya wananchi, ikiwemo ardhi kwa ajili ya makazi na kilimo, yametimizwa kikamilifu.