Mvutano mkali wa kisheria umeendelea kutikisa Mahakama Kuu ya Tanzania, Masjala ya Dar es Salaam, ambapo upande wa utetezi katika kesi inayomkabili mwanasiasa Humphrey Polepole umepata pigo baada ya ombi la dada yake, Christina Polepole, kutupiliwa mbali. Christina, kupitia kwa wakili wake mashuhuri Peter Kibatala, aliiomba mahakama imruhusu kutoa ushahidi wa mdomo kuhusu madai ya ukiukwaji wa haki zake za binadamu.
Katika ombi lake lililowasilishwa mbele ya Jaji Mfawidhi Salma Maghimbi, Christina alidai kuwa alikamatwa na kuwekwa chini ya ulinzi na maafisa wa polisi mnamo Julai 17, 2025. Wakili Kibatala alieleza kuwa tukio hilo, lililoongozwa na Naibu Mkuu wa Upelelezi wa Kanda Maalum ya Dar es Salaam, George Byagemu, lilikuwa na uhusiano wa moja kwa moja na kesi ya msingi ya ndugu yake. "Mteja wangu alihojiwa usiku kucha kuhusu maombi ya ndugu yake yaliyopo mahakamani, na inadaiwa alipigwa. Matukio haya yanaathiri moja kwa moja mwenendo wa shauri hili," alisisitiza Kibatala.
Hata hivyo, Jaji Maghimbi alikataa ombi hilo akisema halina uzito wa kisheria wa kusimamisha mwenendo wa kesi kuu, hasa ikizingatiwa kuwa shauri hilo liliwasilishwa kwa hati ya dharura. "Maombi haya hayawezi kuwa kizuizi cha kuendelea kwa shauri lililopo. Kesi ya msingi itaendelea kusikilizwa kama ilivyopangwa," alisema Jaji Maghimbi katika uamuzi wake.
Upande wa Jamhuri, ukiongozwa na Wakili wa Serikali Mwandamizi, Faraji Ngukah, ulisimama kidete kupinga hoja hiyo, ukisema haina msingi na ni mbinu ya kuchelewesha haki. "Hakuna sababu ya msingi ya kisheria ya kusimamisha kesi hii ili kusikiliza ushahidi huo. Shauri ni la dharura na linapaswa kuendelea," alieleza Ngukah.
Katikati ya mvutano huo, upande wa Jamhuri uliibua hoja nyingine, ukiomba kuwahoji mawakili Kibatala na Godfrey Polepole kutokana na kile walichodai ni mkanganyiko katika hati zao za viapo. Hoja hiyo ilizua mzozo mwingine, huku Wakili Kibatala akiiambia mahakama kuwa hatua hiyo itasababisha mgongano wa kimaslahi, ambapo wao kama mawakili watalazimika kuwa mashahidi na watetezi kwa wakati mmoja, jambo ambalo ni kinyume na sheria.
Kesi hii ya msingi imefunguliwa dhidi ya vigogo wa serikali wakiwemo Mwanasheria Mkuu wa Serikali (AG), Mkuu wa Jeshi la Polisi (IGP), Mkurugenzi wa Mashtaka (DPP), na viongozi wa polisi Kanda Maalum ya Dar es Salaam, ikidai kuwa Humphrey Polepole anashikiliwa kinyume cha sheria.