Hali ya sintofahamu ya kisiasa imeibuka jijini Mwanza baada ya Jeshi la Polisi kuwakamata viongozi na wanachama takriban 25 wa Chama Cha Demokrasia na Maendeleo (CHADEMA), akiwemo Katibu wa chama hicho Kanda ya Victoria, Ndugu Zakaria Obadi. Tukio hilo lilitokea jana, Jumapili, Septemba 7, 2025, wakati wafuasi hao walipokuwa katika harakati za kuingia kwenye Kanisa Katoliki la Kirumba, wilayani Ilemela, kwa ajili ya Ibada.
Kwa mujibu wa taarifa iliyotolewa na CHADEMA, wanachama wao walikuwa wamepanga kuhudhuria ibada hiyo maalumu kwa lengo la kuwaombea watu wote waliowahi kuwa wahanga wa vitendo vya utekaji nchini, wakiwataja kama mashujaa waliosimama kidete. Hata hivyo, mpango wao ulitatizwa na askari polisi waliokuwa eneo hilo, ambao walianza kuwakamata watu walioonekana kuvalia sare za chama au kubainika kuwa ni wanachama wa CHADEMA.
Mashuhuda wa tukio hilo kutoka ndani ya chama hicho wameeleza kuwa zoezi la ukamataji lilifanyika ghafla na kusababisha taharuki. "Tulikuwa tunaingia kanisani kwa amani kwa ajili ya sala. Ghafla, polisi walianza kuwachukua viongozi na wanachama wetu. Hadi sasa, watu 25 wako mikononi mwa polisi na tunaendelea na harakati za kuwatafutia dhamana," alisema mmoja wa wanachama walionusurika kukamatwa.
Alipoulizwa kuhusu suala hili, Kaimu Kamanda wa Polisi Mkoa wa Mwanza, Gidion Msuya, alithibitishia Nipashe Digital kutokea kwa matukio hayo ya ukamataji. Hata hivyo, hakutoa maelezo ya kina kuhusu tuhuma mahususi zinazowakabili viongozi na wanachama hao. Kamanda Msuya alieleza kuwa jeshi hilo bado linafanya uchunguzi wa awali na kwamba litatoa taarifa kamili kwa umma pindi uchunguzi huo utakapokamilika. Wote waliokamatwa wanashikiliwa katika Kituo cha Polisi cha Kirumba.