Mvutano mkali wa kisheria uliibuka jana katika Mahakama Kuu ya Tanzania, Masjala ya Dar es Salaam, wakati Mwenyekiti wa CHADEMA, Tundu Lissu, alipowasilisha hoja nzito akidai kuwa kesi ya uhaini inayomkabili imejaa kasoro za kimamlaka na kimakosa, hali aliyoiita "mtego wa kisheria" unaolenga kumnyima haki.
Akizungumza mbele ya jopo la majaji watatu—Dunstan Nduguru, James Karayemaha, na Ferdinand Kiwonde—Lissu alishambulia msingi mzima wa kesi hiyo, akisema Mahakama ya Hakimu Mkazi Kisutu, iliyoianzisha, haikuwa na mamlaka ya kisheria kumshtaki. Hoja yake kuu ilijikita katika ukweli kwamba alikamatwa Mbinga, mkoani Ruvuma, na hivyo kwa mujibu wa sheria, kesi yake ilipaswa kuanzia huko na si Dar es Salaam.
"Nimekaa gerezani kwa zaidi ya miezi mitano chini ya mamlaka ya mahakama isiyo halali. Hii ni kinyume cha sheria," Lissu alisisitiza, akieleza masikitiko yake kwa kile alichokiita kizuizi kisicho na msingi wa kisheria.
Hata hivyo, upande wa Jamhuri, ukiongozwa na Wakili wa Serikali Mwandamizi, Job Mrema, ulijibu vikali hoja hiyo. Mrema alidai kuwa kisheria, kinachoangaliwa ni mahali ambapo kosa linadaiwa kutendeka, na si mahali mshtakiwa alipokamatwa. "Kosa la uhaini analoshtakiwa nalo lilitendeka Dar es Salaam, hivyo Mahakama ya Kisutu ilikuwa na mamlaka kamili ya kuipokea kesi," alieleza Mrema.
Mbali na suala la mamlaka, Lissu alianisha kasoro nyingine, ikiwemo makosa ya tarehe kwenye nyaraka muhimu za kesi, ambapo tarehe 30 iliandikwa kimakosa kama tarehe 31. Pia, alilalamika kupewa nakala ya nyaraka za kesi yenye kurasa 16 tu, wakati jalada kamili lina kurasa 101, akisema hatua hiyo inamzuia kuandaa utetezi wake ipasavyo.
Akijibu kuhusu makosa ya tarehe, Wakili Mrema alisema hayo ni "makosa ya kibinadamu" ambayo hayawezi kubatilisha msingi wa kesi. "Haliwezi kuwa sababu ya kuiondoa kesi mahakamani," alisisitiza.
Mvutano uliendelea kuhusu utaratibu wa kuita mashahidi wa ngazi za juu serikalini, ambapo Lissu alilalamika kunyimwa fursa hiyo na Mahakama ya Kisutu. Mrema alijibu kuwa sheria inaelekeza maombi hayo maalum yanapaswa kuwasilishwa Mahakama Kuu, na ndivyo Lissu alivyoelekezwa.
Kikao kiliahirishwa baada ya Lissu kuomba muda wa kupitia rejea za kesi mbalimbali zilizotajwa na upande wa Jamhuri ili aweze kutoa majibu yake kikamilifu. Mahakama ilikubali ombi hilo na kesi inatarajiwa kuendelea tena leo asubuhi.