Mvuke wa kampeni kuelekea Uchaguzi Mkuu unaendelea kufukuta katika maeneo mbalimbali nchini, huku wagombea wakitumia siku chache zilizosalia kunadi sera na kuomba kura kwa wananchi. Katika Jimbo la Kinondoni, jijini Dar es Salaam, mambo yanaonekana kuchukua sura mpya baada ya mgombea ubunge kupitia Chama cha Ukombozi wa Umma (CHAUMMA), Bi. Moza Ally, kuweka bayana mikakati yake mikubwa endapo atapata ridhaa ya kuongoza.
Akizungumza jana mbele ya mamia ya wananchi waliojitokeza kumsikiliza katika mkutano wa kampeni, Bi. Moza aligonga ndipo kwenye kero mbili kuu zinazowakabili wakazi wa jimbo hilo: maji na mikopo ya wajasiriamali.
Kuhusu suala la maji, mgombea huyo alikiri kutambua adha kubwa wanayopata wananchi, akisema kuwa tatizo siyo tu upatikanaji wa huduma hiyo, bali hata ubora wake. "Nimesikia kilio chenu, na ninaambiwa kuwa hata hayo maji yakitoka, mara nyingi yanakuwa ni ya chumvi, kitu ambacho si salama kwa afya zenu," alisema Bi. Moza.
Aliwaahidi wakazi hao kuwa endapo watamchagua kuwa mwakilishi wao, suala la upatikanaji wa majisafi na salama litakuwa kipaumbele chake cha kwanza. "Mkinichagua mimi, ninakwenda kuwa sauti yenu bungeni. Nitahakikisha kero hii ya maji inasimamiwa ipasavyo hadi ipatiwe ufumbuzi wa kudumu," aliahidi.
Hata hivyo, ahadi iliyoonekana kuwagusa wengi, hasa wanawake wajasiriamali, ni ile inayohusu mpango wake wa kuboresha upatikanaji wa mikopo ya asilimia 10 inayotolewa na halmashauri kwa makundi maalum. Akikiri kuwa mikopo hiyo ni haki ya kisheria ya wananchi lakini imekuwa na urasimu mwingi, Bi. Moza alitangaza "Mkakati wa Siku 100" wa kutatua changamoto hiyo.
Alifafanua kuwa, pindi tu atakapoingia madarakani, ataweka mikakati miwili madhubuti ndani ya siku 100 za kwanza. Kwanza, ataajiri mwanasheria ambaye atakuwa na jukumu maalum la kusaidia vikundi vya wajasiriamali.
"Mwanasheria huyu atawasaidia kuandika Katiba za vikundi vyenu na kuhakikisha mnapata hati za usajili bila usumbufu wowote. Huduma hii itakuwa bure kabisa," alieleza Bi. Moza huku akishangiliwa.
Pili, aliahidi kumwajiri mtaalamu wa biashara ambaye kazi yake itakuwa ni kukaa na vikundi hivyo, kuboresha mawazo yao ya kibiashara, na kuwasaidia kuandaa maandiko ya miradi (business proposals) yatakayokidhi vigezo vya benki na taasisi za fedha.
"Huyu mtaalamu atahakikisha wazo lenu linapata nguvu na mnakwenda kupata pesa bila kukumbana na ukilitimba wowote. Wananchi wa Kinondoni hamtalipa fedha yoyote kwa huduma hizi," alisisitiza.
Ili kuhakikisha uwajibikaji, Bi. Moza alisema baada ya siku 100 za utekelezaji wa mkakati huo, ataitisha kikao maalum cha tathmini ili kuona ni wananchi wangapi na vikundi vingapi vimefanikiwa kunufaika na mpango huo.
Kauli za mgombea huyo ziliungwa mkono na Mwenyekiti wa CHAUMMA Mkoa wa Dar es Salaam, Bw. Henry Kilewo. Bw. Kilewo alisema inashangaza kuona taifa lenye rasilimali nyingi kama Tanzania bado linakabiliwa na changamoto za msingi.
"Hili ni taifa la tatu kwa utoaji wa dhahabu duniani, lina madini adimu ya Tanzanite, lakini watu wake hawana maji safi. Wanafunzi wanamaliza vyuo vikuu wanazagaa mitaani bila ajira. Watu hawana uhakika na kesho yao. Hali hii haikubaliki. Mnapomchagua Moza, mnachagua suluhisho la shida zenu," alisema Bw. Kilewo.