Ikiwa ni saa 24 tu zimepita tangu aapishwe kushika wadhifa mzito wa Mtendaji Mkuu wa Shughuli za Serikali, Waziri Mkuu mpya wa Jamhuri ya Muungano wa Tanzania, Mhe. Dk. Mwigulu Nchemba, ameanza kazi kwa kishindo. Bila kungoja 'kupasha moto' ofisini, Dk. Nchemba amefanya ziara ya kushtukiza katika Hospitali ya Rufani ya Mkoa wa Dodoma na kutoa maagizo mazito ambayo yamebadili utaratibu wa kuhudumia wagonjwa, hususan kina mama wajawazito, nchi nzima.
Dk. Nchemba, ambaye aliapishwa juzi na Rais Samia Suluhu Hassan katika Ikulu ya Chamwino, aliwasili hospitalini hapo bila taarifa, jambo lililoibua taharuki na hamasa kwa wakati mmoja miongoni mwa watumishi na wananchi. Lengo lake lilikuwa kujionea hali halisi ya utoaji huduma 'bila chenga' wala maandalizi ya kupambwa.
Katika ziara hiyo iliyogusa nyoyo za wengi, Waziri Mkuu amepiga marufuku tabia iliyozoeleka ya kuwataka wajawazito walioko kwenye uchungu kupanga foleni mapokezi kwa ajili ya kujiandikisha. Kwa ukali na msisitizo, ameagiza kuwa kuanzia sasa, uhai wa mama na mtoto ndio kipaumbele, na urasimu wa makaratasi ufuatie baadaye wodini.
"Haiingii akilini mama yuko kwenye uchungu, anateseka, halafu mnamwambia asimame mapokezi kutoa taarifa," alifoka Dk. Nchemba huku akishangiliwa na wagonjwa. "Hili ni agizo kwa hospitali zote nchini: Mjamzito akifika na uchungu, mpelekeni 'leba' mara moja. Masuala ya majina na kadi mtamfuata huko huko wodini akiwa ameshapumzika. Tiba kwanza, daftari baadaye."
Mbali na hilo, Dk. Nchemba amegusa 'jipu' jingine linalowatesa wanawake wengi wa kipato cha chini; suala la vifaa kama ndoo na beseni. Imezoeleka kuwa mjamzito akikosa vifaa hivi anaweza kukosa huduma au kusumbuliwa. Waziri Mkuu amekemea vikali utaratibu huu, akisema kuwa wakati serikali inapambana kukamilisha Bima ya Afya kwa Wote, hospitali lazima ziwe na vifaa vya dharura kwa ajili ya wasio na uwezo.
"Msimzuie mama kujifungua kisa hana ndoo," aliagiza. "Hospitali lazima iwe na stoo ya dharura. Hatuwezi kuweka rehani maisha ya binadamu kwa sababu ya beseni la plastiki."
Akiendelea kukagua na kuhoji wagonjwa ana kwa ana, Dk. Nchemba alibaini kero sugu ya ukosefu wa dawa. Alishangazwa na 'mazingaombwe' ya dawa kukosekana hospitalini huku zikipatikana kwa wingi katika maduka binafsi yaliyozunguka hospitali hizo—ambayo mara nyingi humilikiwa na watumishi hao hao. Ameitaka Wizara ya Afya na Bohari ya Dawa (MSD) kuhakikisha dawa zinazopelekwa zinaendana na mahitaji halisi ya eneo husika ili kumaliza kero hii.
"Rais Samia anamwaga mabilioni kwenye afya, haiwezekani hospitali ya serikali iwe kituo cha vipimo tu, halafu dawa mnamwelekeza mgonjwa duka la nje. Kama duka la nje linapata dawa, MSD inashindwaje? Hii michezo ya kuagiza Panado tu huku dawa muhimu zikiwa hamna ili mufanye biashara zenu lazima ikome," alisisitiza Dk. Nchemba.
Mganga Mfawidhi wa Hospitali hiyo, Dk. Ibenzi Ernest, amepokea maagizo hayo kwa unyenyekevu, akimshukuru Waziri Mkuu kwa kuichagua hospitali hiyo kuwa ya kwanza kuitembelea. Amesema ziara hiyo imewapa chachu ya kuboresha utendaji na kuahidi kuyatekeleza maagizo yote yaliyotolewa ili kuendana na kasi ya Serikali ya Awamu hii.