Kushuka kwa maadili miongoni mwa watumishi wa umma kumetajwa kuwa chanzo kikuu cha wimbi la uvujaji wa nyaraka nyeti za serikali, hali ambayo sasa imetajwa kuwa tishio kwa usalama na ustawi wa taifa. Onyo kali limetolewa kuwa mtumishi yeyote atakayebainika kuhusika na vitendo hivyo atakabiliwa na adhabu kali za kisheria na kinidhamu.
Kauli hiyo nzito imetolewa na Mkurugenzi wa Mafunzo kutoka Chuo cha Utumishi wa Umma Tanzania, Sijali Korojelo, alipokuwa akifunga mafunzo maalum kwa maofisa tarafa na watendaji wa kata walioajiriwa hivi karibuni, katika hafla iliyofanyika mkoani Mbeya.
"Tumekuwa tukishuhudia wimbi la nyaraka nyeti za serikali, zingine zikiwa na mhuri wa 'Siri Kuu', zikisambazwa ovyo kwenye mitandao ya kijamii. Hili ni jambo la hatari sana na ni matokeo ya mmomonyoko wa maadili. Tumewakumbusha watendaji hawa wapya kuhusu sheria na miiko ya utumishi," alisema Korojelo.
Mafunzo hayo, yaliyoandaliwa na Ofisi ya Rais - TAMISEMI kwa kushirikiana na Chuo cha Serikali za Mitaa Hombolo na Chuo cha Utumishi wa Umma, ni sehemu ya mkakati wa kuwajengea uwezo watendaji hao wapya walioajiriwa kufuatia kibali maalum cha Rais Samia Suluhu Hassan.
Akifunga rasmi mafunzo hayo, Mkuu wa Mkoa wa Mbeya, Beno Malisa, aliwataka watendaji hao kwenda kuwa suluhisho la kero za wananchi na wasimamizi wazuri wa miradi ya maendeleo. Aliwaambia kuwa mtihani wao mkuu wa kwanza utakuwa ni usimamizi wa Uchaguzi Mkuu wa mwaka huu.
"Kipimo cha utendaji wenu kitaonekana kwenye usimamizi wa Uchaguzi Mkuu. Nendeni mkahakikishe uchaguzi unafanyika kwa amani, haki, na utulivu katika maeneo yenu," aliagiza Malisa.
Katika hatua ya kipekee, Mkuu huyo wa Mkoa alishauri kuwa mafunzo ya baadaye kwa watumishi wa umma yajumuishe pia somo la afya ya akili, akisema ni eneo muhimu linaloweza kuathiri utendaji na maamuzi ya viongozi.