Jeshi la Polisi mkoani Tanga limethibitisha kuokota miili minne ya watu katika matukio tofauti wilayani Handeni, huku uchunguzi wa awali ukionyesha baadhi ya vifo hivyo vimehusisha matukio ya mauaji. Taarifa iliyotolewa kwa umma leo, Julai 14, 2025, na Kamanda wa Polisi Mkoa wa Tanga, Almachius Mchunguzi, imeeleza kuwa juhudi za kuwatambua waliofariki na kuwakamata waliohusika zinaendelea.
Kamanda Mchunguzi alifafanua kuwa miili miwili imetambuliwa baada ya uchunguzi wa kina. Mmoja kati ya waliofariki ni Benard Wilson Masaka, mwenye umri wa miaka 43, ambaye alikuwa mfanyabiashara wa nyama (Bucha) na mkazi wa Manispaa ya Morogoro. Mauaji ya mfanyabiashara huyo yanahusishwa na wivu wa kibiashara, na tayari watuhumiwa kadhaa wamekamatwa na kufikishwa mahakamani kujibu mashtaka.
Tukio jingine lililohuzunisha ni kuokotwa kwa mwili wa mwanamke mmoja katika Kijiji cha Mkata, Wilaya ya Handeni, mnamo Februari 28, 2025. Baada ya uchunguzi, ilibainika kuwa marehemu ni Fatuma Athuman, mwenye umri wa miaka 24, mkazi wa eneo la Kidereko, Handeni. Kamanda Mchunguzi alithibitisha kuwa watuhumiwa wanne wanaohusishwa na mauaji ya Fatuma wamekamatwa, na uchunguzi unaendelea kukamilishwa ili hatua zaidi za kisheria ziweze kuchukuliwa dhidi yao.
Aidha, Jeshi la Polisi limeokota miili mingine miwili ya wanaume ambayo bado haijatambuliwa. Miili hiyo ilikutwa imetupwa porini katika maeneo tofauti ndani ya Wilaya ya Handeni. Miili hiyo inaendelea kuhifadhiwa kwa ajili ya utambuzi na uchunguzi zaidi ili kubaini chanzo cha vifo vyao na kuwakamata wahusika.
Jeshi la Polisi Mkoa wa Tanga linaendelea kushirikiana kwa karibu na Mikoa mingine nchini, ikiwemo Morogoro, kuhakikisha wahalifu wote wanakamatwa na kufikishwa katika vyombo vya sheria. Kwa kuzingatia matukio haya, Polisi imetoa wito kwa wananchi kuendelea kuwa macho na kutoa taarifa kwa wakati kuhusu viashiria vyovyote vya uhalifu katika maeneo yao. Ushirikiano huu wa wananchi na vyombo vya usalama ni muhimu sana katika kudumisha amani na usalama, na kuhakikisha wahalifu hawana nafasi ya kufanya uhalifu wao.