Mambo yamezidi kuwa magumu kwa mwanaharakati machachari wa mitandao ya kijamii anayeishi nchini Marekani, Mange Kimambi, baada ya Serikali ya Tanzania kuweka wazi kuwa inatafakari namna ya kutumia mikataba ya kimataifa kumrudisha nchini (Extradition) ili ajibu tuhuma nzito zinazomkabili.
Hayo yamejiri leo, Desemba 4, 2025, katika viunga vya Mahakama ya Hakimu Mkazi Kisutu jijini Dar es Salaam, ambapo kesi ya uhujumu uchumi Namba 000021172/2025 inayomkabili mwanadada huyo imetajwa na kupigwa kalenda hadi mwaka jao. Hakimu Mkazi Mwandamizi, Mhe. Hassan Makube, amelazimika kuahirisha shauri hilo hadi Januari 28, 2026, baada ya upande wa Mashtaka kuieleza mahakama kuwa jalada la upelelezi bado halijakamilika.
Kisutu: Upande wa Mange 'Wapwaya' Katika kikao cha leo mahakamani hapo, ilishuhudiwa upande wa utetezi ukiwakilishwa bila kuwepo kwa wakili, jambo lililomfanya Hakimu Makube kutoa angalizo kwa upande wa Jamhuri. "Natoa agizo kwa upande wa Mashtaka kuhakikisha wanakamilisha upelelezi haraka kabla ya tarehe ijayo. Hatuwezi kuendelea na ahirisho la mara kwa mara, tunataka haki itendeke kwa wakati," alisisitiza Hakimu Makube.
Kesi hii inavuta hisia za wengi kutokana na umaarufu wa mtuhumiwa huyo mtandaoni. Mange anakabiliwa na shtaka zito la utakatishaji fedha kiasi cha Shilingi Milioni 138.5. Inadaiwa kuwa kati ya Machi 1 na 31, 2022, akiwa jijini Dar es Salaam (kabla ya kuondoka au kupitia miamala), alijipatia fedha hizo kwa njia ya udanganyifu, akifanya kazi ya uandishi wa habari bila kibali na kutumia vitisho (extortion) kwa watu mbalimbali.
Mashtaka hayo yamefunguliwa chini ya vifungu vizito vya 12(1)(d) na 13(a) vya Sheria ya Utakatishaji Fedha (Sura ya 423, marejeo ya 2019), yakisomwa sambamba na Sheria ya Uhujumu Uchumi, makosa ambapo kisheria hayana dhamana.
Mtego wa Mwanasheria Mkuu (AG) Wakati kesi ikisogezwa mbele Kisutu, huko "uraiani" mjadala umekuwa mkubwa zaidi. Hivi karibuni, Mange alionekana kwenye video iliyosambaa kwa kasi (viral video) akilalamika kwa hofu kuwa amenusa harufu ya serikali kutaka kumrudisha Tanzania kibabe. Hofu hiyo imethibitishwa na Mwanasheria Mkuu wa Serikali (AG), Bw. Hamza Johari.
AG Johari amekaririwa akithibitisha kuwa ofisi yake haijakaa kimya dhidi ya watu wanaochochea vurugu na maandamano nchini wakiwa wamejificha ughaibuni. Amesema kuwa Serikali inaangalia uwezekano wa kutumia Sheria ya Uhamisho wa Watuhumiwa (Extradition Act, 2019) na mikataba ya kisheria iliyopo baina ya Tanzania na Marekani ili kumtia nguvuni.
"Tuna taratibu za kisheria na mikataba ya ushirikiano na nchi wenzetu ikiwemo Marekani. Mtu hawezi kukaa huko na kuvunja sheria za nchi yetu kwa kuchochea uvunjifu wa amani akidhani yuko salama. Tunalifanyia kazi hili kwa umakini," alieleza AG Johari.
Siasa za Mtandaoni na Mkono wa Sheria Hatua hii ya serikali inatafsiriwa kama ujumbe mzito kwa wanaharakati wa mtandaoni (cyber activists) kuwa mkono wa sheria ni mrefu na unaweza kuvuka mipaka. Mange Kimambi amekuwa mwiba kwa serikali mbalimbali madarakani kupitia ukurasa wake wa Instagram, akitumia jukwaa hilo kutoa taarifa ambazo mara nyingi mamlaka imezikanusha na kuzita 'uchochezi'.
Kuelekea Januari 2026, macho yote yataelekezwa Kisutu na katika diplomasia ya kimataifa kuona kama "Mtego" wa AG Johari utafanya kazi au Mange ataendelea kupiga kelele akiwa 'Mambele'.