Wakati joto la kisiasa likiendelea kupanda kuelekea Uchaguzi Mkuu wa Oktoba 29, 2025, na huku kukiwa na wingi wa utabiri na wachambuzi wanaotoa mitazamo mbalimbali, Umoja wa Mitume na Manabii Tanzania umejitokeza kutoa sauti ya kiroho yenye lengo la kutuliza hali ya hewa na kuweka misingi ya amani.
Kupitia kwa Rais wa umoja huo, Nabii Dk. Joshua Mwatyala, viongozi hao wa kiroho wametuma ujumbe mzito na mahsusi kwa mamlaka zote zinazosimamia mchakato wa uchaguzi, wakizitaka kutenda haki kama nguzo kuu ya kulinda amani na utulivu wa taifa. Akizungumza jijini Dodoma, Nabii Mwatyala alisisitiza kuwa upendeleo au dhuluma katika mchakato huo unaweza kuwa chanzo cha kuvuruga amani ambayo nchi imejivunia kwa miaka mingi.
"Rai yetu kama viongozi wa kiroho ni kwamba, mamlaka zinazohusika na uchaguzi zinapaswa kutenda haki. Mshindi atangazwe kuwa mshindi na aliyeshindwa akubali matokeo kwa moyo mweupe na asubiri fursa nyingine baada ya miaka mitano," alisema Nabii Mwatyala.
Aidha, umoja huo umewataka wananchi wote kutumia haki yao ya kikatiba kwa kujitokeza kwa wingi kupiga kura ili kuwachagua viongozi wanaowataka, lakini wakifanya hivyo kwa utulivu na bila kushawishika na hila za kuingia kwenye vurugu.
Akigusia kuhusu utitiri wa utabiri kutoka kwa manabii, waganga, na wachambuzi mbalimbali, Nabii Mwatyala aliwaondoa hofu Watanzania akisema, "Wapo wengi wanaotabiri, lakini sisi tunasimama katika neno la kinabii na kusema uchaguzi huu utamalizika kwa amani na usalama. Baada ya matokeo, kila mtu arejee kwenye shughuli zake za ujenzi wa taifa, tukimshukuru Mungu kwa viongozi atakaotupatia." Ujumbe wao unasisitiza kuwa amani ya nchi ni jukumu la kila mmoja na huanzia kwenye uchaguzi ulio huru na wa haki.