Mama mzazi wa Makamu Mwenyekiti wa CHADEMA Bara, John Heche, amefunguka na kueleza kuwa hakuunga mkono uamuzi wa mwanawe kujiingiza katika siasa. Alisema hofu yake ilitokana na wasiwasi kuhusu misukosuko na changamoto ambazo kwa kawaida huandamana na ulingo wa kisiasa nchini Tanzania.
Akizungumza katika mahojiano na moja ya vyombo vya habari, mama huyo alieleza kuwa hakuwepo karibu na Heche wakati alipokuwa akigombea udiwani kwa mara ya kwanza. Hivyo, alikosa fursa ya kumshawishi kubadili mawazo yake kuhusu kujiunga na siasa.
"Aliposhinda udiwani kwa mara ya kwanza, nilimshukuru Mungu kwa sababu sikushuhudia mchakato wa kampeni zake. Kama ningekuwa karibu, ningemzuia kwa sababu kazi ya siasa sikuipenda kabisa—niliona ina matatizo mengi," alisema mama Heche.
Aliongeza kuwa katika kipindi ambacho mwanawe alikuwa diwani, familia yao ilikumbana na changamoto mbalimbali. Hali hiyo ilizidisha hofu yake kuhusu usalama wa John Heche na familia yake kwa ujumla.
"Wakati akiwa diwani kwa mara ya kwanza, tulitupiwa vitu nje ya nyumba. Sikuipenda kabisa hali hiyo, lakini sasa namshukuru Mungu kwa kuwa amekuwa pamoja na familia yetu na kutulinda," alieleza.
Kutokana na uzoefu huo, mama huyo alijaribu kumshawishi Heche asigombee ubunge, akihofia misukosuko zaidi. Hata hivyo, mwanawe hakukubali ushauri wake.
"Hata alipogombea ubunge, nilijaribu kumzuia kwa sababu nilijua itazua matatizo mengi zaidi, lakini hakukubali. Mwisho wa siku, niliamua kumuunga mkono na kitu pekee nilichoweza kufanya ni kumuombea," alisema.
Mama Heche alifichua kuwa familia yao ilikumbana na vitisho vya aina mbalimbali, ikiwemo tukio la kutupiwa wanyama waliokufa kwenye geti la nyumba yao. Alisema tukio hilo lilizidisha sana hofu yake kuhusu usalama wao kutokana na siasa za mwanawe.
"Kuna siku moja tulikuta mbwa amekufa ametupwa ndani ya geti letu. Ilikuwa ni tukio la kutisha sana," alisimulia.
Licha ya changamoto hizo zote, John Heche ameendelea kuwa mwanasiasa hai na kwa sasa anahudumu kama Makamu Mwenyekiti wa CHADEMA Bara. Nafasi hii inampa ushawishi mkubwa katika harakati za kisiasa nchini.
Mama yake sasa anasema anaendelea kumwombea mwanawe ili azidi kuwa na uvumilivu, hekima na ujasiri katika safari yake ya kisiasa. Pia, anamshukuru Mungu kwa kumlinda yeye na familia yake dhidi ya changamoto zote walizokumbana nazo katika kipindi chote hiki.