Akitumia jukwaa la uzinduzi wa kampeni zake, Wakili Peter Madeleka, anayewania ubunge wa Jimbo la Kivule kupitia ACT-Wazalendo, ameahidi kuleta mapinduzi ya kimaendeleo, akitangaza vipaumbele vyake vikuu kuwa ni afya bora kwa wote, miundombinu imara, na vita dhidi ya ubadhirifu wa mali za umma.
Akihutubia wananchi jijini Dar es Salaam, Madeleka alisema endapo atapata ridhaa, atahakikisha kila mwananchi wa Kivule anapata bima ya afya ili kumaliza adha ya kushindwa kupata matibabu. Alikosoa vikali mfumo uliopo, akitoa mfano hai wa jinsi yeye na chama chake walivyolazimika kulipia gharama za kutoa miili 17 ya wananchi iliyokuwa imezuiliwa hospitalini kwa siku 48 kutokana na madeni. "Hatuwezi kuwa na utawala wa kidhalimu unaodai hata maiti. Sisi hatuendi bungeni kuahidi, bali tumeshaanza kutenda," alisisitiza Madeleka.
Kuhusu kero ya barabara, mgombea huyo alieleza masikitiko yake akisema Jimbo la Kivule limeachwa nyuma kimaendeleo tangu uhuru, likiwa na barabara za vumbi na matope. Alidai kuwa zaidi ya Shilingi bilioni 213 zilitengwa kwa ajili ya ujenzi wa barabara katika jimbo mama la Ukonga, lakini Kivule haijaona lami. "Kuwapa tena miaka mitano ni kukubali kuendelea kuteseka na miundombinu mibovu," alisema.
Wakili Madeleka alirejea ripoti ya Mdhibiti na Mkaguzi Mkuu wa Hesabu za Serikali (CAG), akidai kuwa takriban Shilingi bilioni 48 hupotea kila mwaka kutokana na ubadhirifu unaofanywa na baadhi ya viongozi wa halmashauri. Alisema fedha hizo ndizo zingeweza kutatua changamoto za afya, elimu na barabara, na akawataka wananchi wasiwape kura viongozi wanaohusishwa na vitendo hivyo.
Aidha, aliahidi kupigania fursa za ajira na mikopo kwa vijana ili waweze kuanzisha biashara, akilaumu sera za sasa kwa kushindwa kutatua tatizo la ajira. Alihitimisha kwa kuahidi uwajibikaji wa hali ya juu, akisema, "Nikichaguliwa, ofisi yangu itakuwa wazi saa 24 kwa ajili ya kusikiliza na kutatua kero za wananchi wangu."