Katika hatua ya kipekee iliyojaa ishara za kimila, machifu wa Mkoa wa Mbeya wametangaza rasmi kumpa Rais Samia Suluhu Hassan ulinzi wa jadi, wakieleza kukerwa kwao vikali na wimbi la matusi na dharau dhidi ya kiongozi huyo mkuu wa nchi linaloendelea kwenye mitandao ya kijamii. Machifu hao wamewataka wahusika kuacha mara moja, huku wakihoji udhaifu wa wasimamizi wa mitandao hiyo katika kudhibiti uchafu unaochafua hewa ya amani nchini.
Wakitoa msimamo wao mbele ya Rais Samia kwenye mkutano wa kampeni wa CCM uliofanyika Mbalizi, Mbeya, Septemba 4, 2025, Mwenyekiti wa Machifu wa Mbeya Vijijini, Chifu Soja Masoko, alisema wao kama wasaidizi wa rais (Chifu Hangaya), hawatavumilia kuona heshima yake ikivunjwa.
"Tuna hasira sana. Sisi machifu wote Tanzania ni wasaidizi wako. Tunapoona watu wanabeza kazi unazofanya na kudiriki kukutukana mitandaoni, hatupendezwi hata kidogo," alisema Chifu Masoko kwa hisia. Alionya kuwa wanaofanya vitendo hivyo wanawasukuma machifu watumie "mambo yao ya kimila" kukemea hali hiyo, akisisitiza kuwa Tanzania ni nchi ya amani na hawatakubali mtu yeyote alete mtikisiko.
Ili kuthibitisha dhamira yao, machifu hao walimtunuku Rais Samia zawadi za kimila zenye uzito mkubwa. Walimkabidhi fimbo kama ishara ya ulinzi na mamlaka, wakimhakikishia kuwa yuko salama mikononi mwa wazee. Vilevile, walimpatia mgolole mweupe kuashiria dua yao ya uchaguzi ujao wa Oktoba kuwa wa amani na utulivu.
Zawadi yenye uzito zaidi ilikuwa ni kiti cha miguu mitatu, ambacho katika mila za kichifu, ni ishara ya utulivu, mamlaka isiyoyumba, na heshima ya juu kabisa. "Tunapomkalisha chifu kwenye kiti hiki, hakuna anayeweza kumyumbisha. Nawe Rais Samia umekalia kiti hiki, hutayumba wala hutayumbishwa," alifafanua Chifu Masoko. Aidha, walimzawadia mbuzi kama ishara ya baraka na heshima. Kitendo hiki cha machifu kimefasiriwa kama ujumbe mzito wa kisiasa na kitamaduni, ukionyesha uungwaji mkono wao kwa Rais Samia katika kipindi hiki cha kuelekea uchaguzini.