Waziri wa Maendeleo ya Jamii, Jinsia, Wanawake na Makundi Maalumu, Mheshimiwa Dkt. Dorothy Gwajima, ameingilia kati haraka suala la video yenye kuudhi inayosambaa kwa kasi kwenye mitandao ya kijamii, ikionyesha kundi la mabinti ambao wanadaiwa kuwa ni wanafunzi wa vyuo vikuu wakishiriki vitendo vya udhalilishaji wa maneno na vipigo dhidi ya mwenzao. Tukio hili limetokea katika kipindi cha sikukuu ya Pasaka, na video hiyo ilianza kusambaa na kumfikia waziri usiku wa kuamkia Jumapili ya Pasaka, Aprili 20, 2025, kupitia mitandao mbalimbali, hasa Instagram.
Taarifa za awali zilizomfikia Waziri zilieleza kuwa mabinti waliohusika katika vitendo hivyo vya kikatili ni wanafunzi wanaosoma katika vyuo vikuu viwili tofauti nchini, huku wengine wakitajwa kuwa hata wanasoma darasa au kozi moja na yule binti aliyedhalilishwa na kurekodiwa. Inasikika wazi kwenye video hiyo kuwa chanzo cha mgogoro huo kinahusishwa na ugomvi wa kumgombania mwanaume, ambaye anatajwa jina lake moja kama Mwijaku.
Dkt. Gwajima ameeleza kusikitishwa kwake mno na tabia hii, akisema kuwa inashangaza kuona mabinti ambao ni wasomi, ambao jamii inategemea wajikite kwenye masomo yao na kuunganisha nguvu kupambana na ukatili dhidi ya wanawake na watoto, badala yake wanatumia elimu na nguvu zao kufanyiana vitendo vya kikatili, kudhalilishana, na kujidhalilisha wao wenyewe.
"Udhalilishaji huu waliofanya kwa binti mwenzao haukubaliki hata kidogo na unapaswa kukemewa kwa nguvu zote. Kitendo hiki ni kinyume na sheria zote za nchi, kinakwenda kinyume na utu, na hakina chembe ya haiba ya mwanamke wa kizazi hiki. Haipendezi hata kidogo kuona binti au mtu yeyote anapokuwa na mgogoro na mwenzake anachukua hatua za udhalilishaji badala ya kutafuta suluhu au kufuata taratibu. Hii ni sawa na kujidhalilisha mwenyewe na kudhalilisha kundi zima la wanawake," alifafanua Dkt. Gwajima kwa masikitiko makubwa.
Kufuatia tukio hilo, Waziri Dkt. Gwajima amechukua hatua za haraka kuhakikisha haki inatendeka na manusura anapata msaada stahiki. Amefanikiwa kuwasiliana na manusura (binti aliyedhalilishwa) na kumuunganisha moja kwa moja na huduma muhimu za ustawi wa jamii, msaada wa kisaikolojia kwa ajili ya kupona majeraha ya kiakili na kihisia, pamoja na huduma za Dawati la Jinsia katika Jeshi la Polisi. Kupitia Dawati hilo, binti huyo pia atapata msaada wa kisheria ili hatua zinazostahili zichukuliwe dhidi ya waliohusika.
Aidha, Dkt. Gwajima amethibitisha kuwa amewasiliana na Wakuu wa vyuo vikuu vinavyodaiwa kuhusika kupitia Madawati ya Jinsia yaliyopo vyuoni humo ili hatua za kinidhamu zichukuliwe dhidi ya wanafunzi watakaobainika kuhusika. Pia, amewasiliana na Waziri mwenye Dhamana na Elimu, Sayansi na Teknolojia, pamoja na Waziri wa Mambo ya Ndani ya Nchi, kwa ajili ya hatua zaidi za kiserikali zitakazochukuliwa dhidi ya wahusika wa vitendo hivi vya udhalilishaji.
Hatua hizi za haraka za serikali kupitia Wizara ya Maendeleo ya Jamii, Jinsia, Wanawake na Makundi Maalumu zinalenga kutoa ujumbe kuwa vitendo vya udhalilishaji, hasa vinavyofanywa na vijana wasomi na kusambazwa mtandaoni, havitatolewa nafasi katika jamii na hatua kali za kisheria na kinidhamu zitachukuliwa dhidi ya wahusika.