Mtandao wa Watetezi wa Haki za Binadamu Tanzania (THRDC) umetoa tamko kali kulaani vitendo vilivyoripotiwa vya kuwakamata na kuwazuia wananchi kufika katika Mahakama ya Hakimu Mkazi Kisutu jijini Dar es Salaam kufuatilia mwenendo wa kesi inayomkabili Mwenyekiti wa Chama cha Demokrasia na Maendeleo (CHADEMA), Bwana Tundu Lissu. THRDC imesisitiza kuwa hatua hizo ni ukiukwaji wa sheria za nchi na kanuni za msingi za haki za binadamu.
Akizungumza na waandishi wa habari jijini Dar es Salaam, Mratibu Kitaifa wa THRDC, Wakili Onesmo Olengurumwa, alieleza kuwa hakuna sheria yoyote nchini Tanzania inayompa mamlaka mtu au taasisi kumzuia raia kuhudhuria na kusikiliza shauri linaloendeshwa mahakamani, hasa ikiwa linamhusu kiongozi au mtu wanayemjali. "Kitendo cha Jeshi la Polisi kuwazuia watu kufika mahakamani hakina uhalali wa kisheria. Ni kwenda kinyume na utaratibu na kunaweza kuzua hofu na taharuki isiyo ya lazima, jambo ambalo ni hatari kwa amani ya nchi yetu," alisema Wakili Olengurumwa.
Alifafanua zaidi kuwa haki ya kufika mahakamani kusikiliza kesi, hususan inayomkabili kiongozi wa ngazi ya juu kama Tundu Lissu, ni muhimu kwa uwazi na kwa wananchi kuelewa mustakabali wa tuhuma zinazomkabili mtu huyo. Alisema uwepo wa wananchi mahakamani ni sehemu ya utekelezaji wa dhana ya uwazi katika utoaji haki.
"Sisi kama watetezi wa haki za binadamu, tunalitaka Jeshi la Polisi kusitisha mara moja vitendo hivi vya kuzuia watu, na vilevile vitendo vingine vinavyohusishwa na matumizi ya nguvu kama kuwapiga, kuwajeruhi wananchi, wanachama wa vyama vya siasa, waandishi wa habari, na makundi mengine," alisisitiza Olengurumwa. "Vitendo hivyo viko nje kabisa ya misingi ya haki za binadamu na havipaswi kufumbiwa macho katika jamii inayojali utu."
Wakili Olengurumwa aliendelea kueleza kuwa msingi wa amani katika taifa lolote unajengwa juu ya nguzo za upendo, haki, umoja, utulivu na uzalendo. Alionya kuwa pasipo kuheshimu na kulinda haki za watu, misingi hiyo hudhoofika na amani inaweza kutoweka, jambo litakaloliingiza taifa katika kipindi kigumu. "Huwezi kuwa na amani ya kweli kama haki za watu hazilindwi ipasavyo," aliongeza.
Aidha, aligusia taarifa za Bwana Lissu kunyimwa haki ya kuonana na ndugu zake na watu wake wa karibu akiwa chini ya ulinzi, akikitaja kitendo hicho kama ukatili unaoweza kuchochea hisia za uvunjifu wa amani.
Katika hatua nyingine, THRDC imetoa wito maalum kwa Rais wa Jamhuri ya Muungano wa Tanzania, Mheshimiwa Samia Suluhu Hassan. Mtandao huo umemuomba Rais kutumia mamlaka aliyonayo kushughulikia changamoto hizi za haki za binadamu ili kuleta muafaka wa kitaifa. Wito huo umehusishwa na falsafa ya Rais ya Maridhiano, Ustahimilivu, Mabadiliko na Kujenga Upya (4R). THRDC imesisitiza umuhimu wa hatua hizo hasa katika kipindi hiki ambacho taifa linaelekea kwenye Uchaguzi Mkuu, ili kuhakikisha uchaguzi unakuwa huru, wa haki na unaofanyika katika mazingira salama kwa wote.