Mamlaka ya Udhibiti wa Huduma za Nishati na Maji (EWURA) imetoa wito mzito kwa Watanzania, hususan wale wa Kanda ya Ziwa, kuchangamkia fursa mbalimbali za kiuchumi zinazotokana na mradi mkubwa wa bomba la mafuta ghafi kutoka Hoima, Uganda, hadi Chongoleani, Tanzania. Wito huu umetolewa katika Maonesho ya Wakulima ya Nanenane yanayoendelea katika viwanja vya Nyamhongolo, mkoani Mwanza.
Meneja wa EWURA Kanda ya Ziwa, George Mhina, ameeleza kuwa lengo kuu la EWURA katika maonesho haya ni kutoa elimu kwa wananchi kuhusu fursa zilizopo katika sekta za nishati na maji. Alisisitiza kuwa mikoa ya Kagera na Geita, ambayo inapitiwa na bomba la mafuta, inao uwezo mkubwa wa kunufaika na mradi huu. "Sisi EWURA ndio tunasimamia ushirikishwaji wa wazawa," alisema Mhina, akiongeza kuwa ili Mtanzania anufaike, ni lazima ajisajili katika kanzi data ya EWURA.
Aidha, Mhina ametoa wito kwa wananchi kuwekeza katika vituo vya mafuta vijijini. Ameeleza kuwa bado kuna uhaba wa vituo hivyo, hasa katika Mkoa wa Mwanza, na kwamba EWURA imeweka mazingira wezeshi kwa wawekezaji wapya. Mtu anaweza kuanzisha kituo kidogo cha mafuta kwa mtaji wa kuanzia Tsh 50 milioni. Lengo ni kuongeza idadi ya vituo hivyo nchini, ambayo kwa sasa ni zaidi ya 500, lakini bado haitoshelezi mahitaji.
Pia, EWURA inawahimiza wananchi kutumia nishati safi ya kupikia. Serikali ya Awamu ya Sita, chini ya Rais Samia Suluhu Hassan, imeweka lengo la kufikia matumizi ya nishati safi kwa asilimia 80 ya Watanzania ifikapo mwaka 2034. Hii ni fursa kwa wananchi kuachana na nishati hatarishi kama mkaa na kuni, na badala yake kutumia gesi, umeme, na nishati mbadala ambazo ni salama na rafiki kwa mazingira.
Mhina amemaliza kwa kuwahimiza wananchi kutembelea banda la EWURA kupata elimu kuhusu huduma mbalimbali, ikiwemo umeme, gesi, na maji. Pia aliwasihi wananchi kujua mafundi waliosajiliwa na EWURA ili kuhakikisha miundombinu ya umeme katika nyumba zao au viwanda inakuwa salama.