Mgombea urais kupitia Chama Cha Mapinduzi (CCM), Dk. Samia Suluhu Hassan, ametoa wito mzito kwa Watanzania wote, akisisitiza kuwa amani na utulivu wa nchi ni jambo lisilokuwa na mbadala, hasa katika kuelekea Uchaguzi Mkuu wa mwaka huu. Akizungumza na umati wa wananchi katika Uwanja wa Kajengwa huko Makunduchi, Zanzibar, kiongozi huyo alituma salamu za wazi kuwa mchakato wa uchaguzi ni sherehe ya kidemokrasia na kamwe haupaswi kugeuzwa kuwa uwanja wa vita.
Katika hotuba yake ya kampeni mnamo Jumatano, Septemba 17, 2025, Dk. Samia aliwasihi raia kuzingatia taratibu zilizowekwa za kupiga kura na kisha kurejea majumbani mwao kwa utulivu, ili kuruhusu vyombo husika kukamilisha kazi zao. "Uchaguzi ni tendo la kidemokrasia. Ni watu kwenda kwa utaratibu, kupiga kura zao na kisha kurudi nyumbani kusubiri matokeo. Hii ndiyo njia pekee ya kuiweka nchi yetu salama," alisisitiza Dk. Samia.
Alikumbushia ahadi aliyoitoa kwa wazee wa Pemba punde tu baada ya kuingia madarakani, ambapo walimtaka ahakikishe anailinda na kuidumisha amani ya nchi. Dk. Samia aliahidi mbele ya wakazi wa Makunduchi kuwa ataitekeleza ahadi hiyo kwa nguvu zote, akionya vikali dhidi ya matumizi ya nguvu au silaha za aina yoyote.
"Nataka niwaambie, na wote wanaotusikiliza wafahamu hili; kutumia silaha, ziwe za moto au za jadi, hakuwezi kuleta suluhu ya kudumu. Amani na utulivu wa taifa letu ni jambo la muhimu kuliko agenda nyingine zote, hususan wakati huu," aliongeza.
Ili kuwatoa hofu wananchi, Dk. Samia alihakikishia umma kuwa vyombo vya ulinzi na usalama nchini vimejipanga kikamilifu kulinda raia na mali zao, na kuhakikisha kuwa hakuna Mwana-CCM wala mwanachama wa chama kingine atakayedhurika. "Serikali yenu imejipanga vizuri. Kwa hiyo, kama hutaki kishindo, nenda kapige kura yako halafu rudi nyumbani utulie," alisema.
Ujumbe huo wa amani uliungwa mkono na Mgombea Urais wa Zanzibar kwa tiketi ya CCM, Dk. Hussein Ali Mwinyi. Alisema kuwa misingi mikuu ya chama hicho ni kudumisha amani, kuimarisha umoja, kujenga mshikamano, na kukuza maridhiano miongoni mwa Watanzania wote.