Waziri Mkuu wa Israel, Benjamin Netanyahu, mwanasiasa mkongwe na mwenye historia ndefu zaidi ya kuongoza taifa hilo, ameweka wazi mipango yake ya baadaye ya kisiasa kwa kutangaza kuwa anatarajia kugombea tena wadhifa huo mkuu katika uchaguzi ujao uliopangwa kufanyika Novemba 2026.
Kauli hiyo ya Netanyahu, ambaye anafahamika kwa jina la utani la 'Bibi', aliitoa wakati akihojiwa na kituo kimoja cha televisheni nchini Israel. Alipoulizwa moja kwa moja kama ana nia ya kuendelea kusalia madarakani, alijibu kwa mkato, "Ndio." Waandishi hawakuishia hapo, walimuuliza tena kama anatarajia kupata ushindi katika uchaguzi huo, naye alikubali, akionyesha kiwango kikubwa cha kujiamini.
Tangazo hili linakuja wakati Netanyahu akiwa anaongoza serikali inayotajwa kuwa ya mrengo wa kulia zaidi katika historia ya Israel, na pia akiendelea kukabiliwa na changamoto za kisheria zinazohusiana na tuhuma za rushwa ambazo zimekuwa zikimwandama kwa miaka kadhaa.
Historia ya Netanyahu katika siasa za Israel ni ndefu na yenye misukosuko mingi. Aliingia madarakani kwa mara ya kwanza mwaka 1996, akiwa na umri wa miaka 46 tu, na kuweka rekodi ya kuwa waziri mkuu mwenye umri mdogo zaidi kuwahi kuliongoza taifa hilo. Hata hivyo, alipoteza kiti chake katika uchaguzi wa 1999 na kuonekana kupotea kabisa kwenye ulingo wa siasa.
Lakini miaka kumi baadaye, mnamo 2009, alifanya urejeo wa kishindo na kurudi madarakani. Tangu wakati huo, amekuwa akihudumu kama waziri mkuu kwa vipindi mbalimbali, na kuvunja rekodi ya kuwa kiongozi aliyehudumu kwa muda mrefu zaidi, akimpita hata mwanzilishi wa taifa la Israel, David Ben-Gurion.
Safari yake haijawa rahisi. Mnamo 2021, alilazimika kuachia madaraka kwa muda baada ya muungano wa vyama vya upinzani kuungana na kumwondoa. Hata hivyo, udhaifu wa muungano huo ulimpa nafasi ya kujipanga upya.
Katika uchaguzi wa mwaka 2022, Netanyahu alirejea madarakani kwa nguvu, lakini ushindi wake ulitegemea pakubwa uwezo wake wa kuunganisha vyama vya mrengo mkali wa kulia na vyama vya kidini. Muungano wake wa mrengo wa kulia ulipata jumla ya viti 64 kati ya 120 vya Bunge la Israel, maarufu kama Knesset.
Ndani ya muungano huo, chama chake cha Likud kilipata viti 32, lakini nguvu kubwa iliyomsaidia kurudi ilitoka kwa washirika wake, hasa muungano wa vyama vya 'Religious Zionism' (Usiyuni wa Kidini), ambao ulipata viti 14—idadi kubwa ambayo haikutarajiwa na wengi. Kuongezeka kwa nguvu kwa vyama hivi vyenye misimamo mikali kumezua mijadala mikali ndani na nje ya Israel kuhusu mustakabali wa kidemokrasia wa nchi hiyo na mchakato wa amani na Wapalestina.
Utawala wake wa sasa umekumbwa na migawanyiko mikubwa ya ndani, ikiwemo maandamano makubwa ya raia waliokuwa wakipinga mipango ya serikali yake ya kufanyia marekebisho makubwa mfumo wa mahakama, hatua ambayo wakosoaji walidai ililenga kudhoofisha Mahakama Kuu na kumlinda Netanyahu dhidi ya kesi zake za rushwa.
Licha ya dhoruba hizi zote, tangazo la Netanyahu la kutaka kugombea tena 2026 linaonyesha azma yake ya kuendelea kushikilia usukani wa siasa za Israel.