Safari ya kihistoria ya wanaanga kutoka mataifa mbalimbali imeanza, baada ya chombo cha anga za juu cha SpaceX kurushwa kwa mafanikio makubwa kuelekea Kituo cha Kimataifa cha Anga za Juu (ISS). Chombo hicho, kilichobeba wanaanga kutoka Marekani, Japan na Urusi, kimeingia kwenye mzunguko wa dunia na kinaelekea ISS kwa ajili ya utafiti wa kisayansi.
Kwa mujibu wa ripoti kutoka vituo vya habari vya kimataifa kama NPR na CBS News, roketi ya Falcon 9 ya kampuni ya SpaceX, iliyobeba chombo cha anga cha Dragon, ilirushwa kutoka Kituo cha Anga cha Kennedy huko Florida, Marekani, majira ya saa 11:43 asubuhi kwa saa za Marekani ya Mashariki. Safari hiyo iliyotarajiwa kufanyika siku moja kabla iliahirishwa kutokana na changamoto za hali ya hewa.
Wanaanga walio ndani ya chombo hicho ni pamoja na Jenna Cardman na Mike Fincke kutoka Shirika la Anga la Marekani (NASA), Kimiya Yui kutoka Shirika la Utafiti wa Anga la Japan (JAXA), na Oleg Platonov kutoka Shirika la Anga la Urusi (Roscosmos). Baada ya kurushwa, sehemu ya kwanza ya roketi ya Falcon 9 ilijitenga na chombo kikuu, na ndani ya dakika tisa tu, chombo cha Dragon kiliingia salama katika mzunguko wa anga za juu.
Chombo hicho kinatarajiwa kutumia takriban saa 15 angani kabla ya kufika na kuungana na kituo cha ISS. Baada ya kufika, wanaanga hawa, walioko katika misheni iliyopewa jina la ‘Crew-11’, watafanya kazi katika kituo hicho kwa muda wa miezi sita, wakitekeleza majaribio na utafiti wa kisayansi unaofikia zaidi ya makumi kadhaa. Ushirikiano huu wa kimataifa katika anga za juu unaonyesha jinsi nchi mbalimbali zinavyoweza kushirikiana kwa ajili ya maendeleo ya kisayansi na teknolojia, licha ya tofauti za kisiasa.