Kampuni ya Nintendo ilikuwa imetangaza mapema wiki hii kuwa ingeanza kupokea maagizo ya awali ya kifaa chake kipya cha michezo, Nintendo Switch 2, kuanzia tarehe 9 Aprili. Hata hivyo, ghafla mambo yamebadilika baada ya Rais wa Marekani, Donald Trump, kutangaza sera mpya kuhusu ushuru wa bidhaa zinazoingia nchini humo. Kutokana na hali hii, Nintendo imelazimika kusitisha kwa muda mchakato huo wa uagizaji wa awali nchini Marekani.
Taarifa kutoka kwa Nintendo iliyotolewa tarehe 4 Aprili ilieleza kuwa, "Uagizaji wa awali wa Nintendo Switch 2 nchini Marekani hautaanza tarehe 9 Aprili kama ilivyopangwa. Hii ni kutokana na kampuni kutaka kufanya tathmini ya kina kuhusu athari zinazoweza kujitokeza kutokana na ushuru huo pamoja na mabadiliko yanayoendelea kwenye soko. Nintendo itatoa taarifa zaidi kuhusu lini uagizaji huu utaanza. Tarehe ya uzinduzi wa bidhaa yenyewe, ambayo ni Juni 5, inabaki kuwa ile ile."
Inaonekana kuwa mashabiki wa Nintendo nchini Marekani watalazimika kusubiri kwa wiki kadhaa zaidi kujua lini wataweza kuweka oda zao za awali kwa ajili ya Nintendo Switch 2. Hali hii inatokea wakati ambapo kampuni ilikuwa imeweka matarajio makubwa kwa uzinduzi huu, huku watu wengi wakisubiri kwa hamu kujionea maboresho yaliyofanywa kwenye kifaa hicho kipya.
Licha ya kuahirishwa kwa uagizaji wa awali, Nintendo imesisitiza kuwa tarehe ya uzinduzi rasmi wa Switch 2, ambayo ni Juni 5, bado haijabadilika. Hata hivyo, kuna wasiwasi kuwa bei ya kifaa hicho inaweza kupanda zaidi ya ile iliyotangazwa awali ya dola za Marekani 449 (takriban TZS 1,122,500 kwa hesabu ya sasa), kutokana na ushuru mpya unaotarajiwa kuathiri gharama za uingizaji wa bidhaa.
Sera za ushuru za marais mbalimbali zimekuwa na athari kubwa kwenye biashara ya kimataifa, na hatua ya Trump inaonyesha jinsi siasa za kiuchumi zinavyoweza kuathiri hata kampuni kubwa za teknolojia kama Nintendo na wateja wao. Sasa, watu wanangoja kuona Nintendo itachukua hatua gani kukabiliana na changamoto hii na lini wataweza hatimaye kupata mikononi mwao kifaa hicho kipya cha michezo.