Taasisi za Elea Foundation na Nordic Impact Funds zimeingia mkataba muhimu wa kuwekeza fedha mpya katika kampuni ya teknolojia ya kilimo, MazaoHub, kwa lengo la kuboresha huduma za ugani kwa wakulima nchini Tanzania kupitia mifumo ya kidijitali. Uwekezaji huu kabambe unalenga kuanzisha mfumo wa kidijitali wa maafisa ugani, unaoweza kufananishwa na 'Uber' ya wataalamu wa kilimo, pamoja na kuzindua jukwaa la kisasa la masoko ya wakulima, Cropsupply.com.
Akizungumzia kuhusu uwekezaji huu, Afisa Mtendaji Mkuu wa MazaoHub, Geophrey Tenganamba, alieleza kuwa rasilimali hizi mpya zitawezesha wakulima kupata ushauri wa kitaalamu kwa urahisi zaidi kupitia huduma za kidijitali na kuwauunganisha na maafisa ugani kwa ukaribu. Zaidi ya hayo, mfumo huu utawawezesha wakulima kuuza mazao yao kwa uwazi, kupata faida stahiki, na kuwa na uhakika wa masoko ndani na nje ya Tanzania.
Tenganamba alifafanua jinsi uwekezaji huu ulivyosaidia kampuni yake kutekeleza malengo yake, akibainisha kuanzishwa kwa jukwaa la CropSupply.com. Jukwaa hili linawaunganisha wakulima, wanunuzi, wasafirishaji, na wafanyabiashara wa mazao, likiwaruhusu kupata taarifa sahihi kuhusu upatikanaji wa mazao katika ngazi mbalimbali – nchi, mkoa, na hata kijiji. Hii itapunguza changamoto za taarifa potofu na kuongeza ufanisi katika minyororo ya thamani ya kilimo.
Mbali na kutoa taarifa za masoko, mfumo huu pia una uwezo wa kuzalisha ripoti za kufuatilia asili ya mazao, maarufu kama 'traceability reports'. Hizi ni ripoti muhimu zinazohitajika sana na wanunuzi kutoka nje ya nchi, na zitaimarisha uaminifu na ubora wa mazao ya Tanzania katika soko la kimataifa.
"Hakika, chini ya uwezeshwaji wa Wizara ya Kilimo, kampuni yetu ya MazaoHub, ambayo ni moja ya matokeo chanya ya mradi wa BBT (Building a Better Tomorrow), imekuwa ikipokea uwekezaji kutoka kwa wadau mbalimbali. Uwekezaji huu wa sasa unaiwezesha kampuni kufungua masoko ya wakulima kwa njia ya kidijitali, hususan katika kuagiza na kufanya biashara ya mazao kupitia mfumo wa Cropsupply.com," alifafanua Tenganamba.
Aliongeza kuwa mfumo huo utawawezesha wakulima wa hapa nchini kuuza bidhaa zao nje ya nchi. Kwa sasa, mfumo huu tayari unafanya kazi katika nchi tatu ambazo ni Tanzania, Kenya, na Zambia, kutokana na ushirikiano wa karibu uliopo kati ya nchi hizi katika sekta ya kilimo. Hii ni hatua kubwa kuelekea kuwezesha wakulima wadogo na wa kati kupanua wigo wa masoko yao na kunufaika zaidi na kilimo chao.