Katika harakati za kujenga uchumi imara wa kidijitali nchini, Mamlaka ya Mawasiliano Tanzania (TCRA) imetambua kikwazo kikubwa kinachowakwamisha wanafunzi wengi: dhana potofu iliyokita mizizi kwamba somo la hisabati ni gumu na haliwezekani. Ili kubomoa ukuta huu wa hofu, TCRA imetoa wito mzito kwa walimu wa hisabati nchi nzima, kupitia chama chao (MAT/CHAHITA), kuanzisha mapinduzi ya kimtazamo mashuleni.
Wito huo ulitolewa na Mkurugenzi Mkuu wa TCRA, Dk. Jabir Bakari, wakati wa ufunguzi wa mkutano mkuu wa Chama cha Walimu wa Hisabati Tanzania (MAT/CHAHITA) mkoani Singida. Akisisitiza kuwa hisabati ndiyo lugha ya teknolojia, Dk. Bakari alisema mustakabali wa Tanzania katika sayansi na uchumi wa kidijitali unategemea jinsi taifa litakavyowajenga wanafunzi imara katika somo hili.
"TCRA inatambua kuwa mada zote za hisabati—kuanzia namba, aljebra, jiometri hadi kalkulasi na takwimu—ndio msingi unaomwandaa mwanafunzi kuingia kwenye ulimwengu wa kidijitali," ilisema hotuba ya Dk. Bakari. "Tunawasihi mshirikiane na shule zenu kuanzisha na kuimarisha Klabu za Hisabati na Klabu za Kidijitali. Hizi ziwe maabara za kukuza vipaji na kuonyesha kwa vitendo matumizi ya hisabati katika maisha ya kila siku."
Mamlaka hiyo ilieleza kuwa jukumu lake ni kuweka mazingira wezeshi ya miundombinu, kama intaneti ya kasi, lakini jukumu la kuwajaza wanafunzi maarifa liko mikononi mwa walimu. Umuhimu wa miundombinu hii unathibitishwa na tafiti zinazoonyesha kuwa kila ongezeko la asilimia 10 la matumizi ya intaneti ya kasi (broadband) linaweza kukuza Pato la Taifa kwa wastani wa asilimia 2.5 katika nchi zinazoendelea.
Kwa upande wake, Mwenyekiti wa MAT/CHAHITA, Dk. Said Sima, alikiri kuwepo kwa changamoto, ikiwemo ufaulu mdogo wa wanafunzi na uhaba wa fedha. Hata hivyo, alibainisha kuwa chama hicho kimepata mafanikio ya kujivunia, likiwemo kuipeperusha bendera ya Tanzania kimataifa. Alitaja ushindi wa medali nne za shaba katika Mashindano ya Hisabati ya Afrika (PAMO) mwaka 2024 nchini Afrika Kusini na medali nne nyingine mwaka 2025 nchini Botswana, kama dhibitisho kuwa wanafunzi wa Kitanzania wanaweza.
Safari ya kuifanya Tanzania kuwa taifa la sayansi na teknolojia inahitaji juhudi za pamoja. Wakati TCRA ikitandaza miundombinu ya kidijitali, jukumu la kuwajenga wataalamu wa kesho liko mikononi mwa walimu, ambao sasa wametakiwa kufundisha somo hili kwa upendo na ubunifu ili kufuta historia ya kulichukia.