Microsoft imetangaza maboresho makubwa katika utendaji wa kiolesura cha mtumiaji (UI) cha kivinjari chake cha Edge, hatua inayolenga kuongeza kasi na ufanisi wa matumizi.
Kwa mujibu wa taarifa rasmi, masasisho haya yamefanya vipengele kama folderi za upakuaji, historia ya kuvinjari, na hali fiche (Incognito Mode) kupakia kwa kasi ya hadi asilimia 40 zaidi kuliko hapo awali.
Marekebisho haya yalianza kutekelezwa kwenye toleo la Edge 132 na sasa yameimarishwa zaidi kwenye toleo jipya la Edge 133. Microsoft imeeleza kuwa maboresho haya yamewezekana kwa kutumia mfumo mpya wa UI unaoitwa WebUI 2.0, ambao umeongeza kasi ya upakiaji wa vipengele vya kivinjari.
Moja ya maboresho makubwa ni katika kasi ya kufungua dirisha la upakuaji wa faili (Download Window), ambalo sasa linachukua sekunde 0.428 badala ya 0.927, upungufu wa karibu nusu ya muda wa awali. Vilevile, historia ya kuvinjari na hali fiche zinapakia haraka zaidi, kuboresha uzoefu wa mtumiaji.
Athari ya maboresho haya itahisiwa zaidi kwenye kompyuta zenye uwezo wa chini, hasa zile zinazotumia diski za kawaida (HDD) badala ya SSD. Watumiaji wa vifaa vya zamani wanatarajiwa kuona tofauti kubwa katika utendaji wa kivinjari cha Edge baada ya sasisho hili.
Microsoft imesisitiza kuwa maboresho haya si tu kuhusu kasi, bali ni hatua muhimu katika kuhakikisha kuwa watumiaji wanapata uzoefu laini na bora zaidi wa kuvinjari mtandaoni.