Kampuni ya teknolojia ya Google imetangaza hatua kubwa itakayobadilisha namna mamilioni ya watu wanavyotumia intaneti, kwa kuzindua rasmi akili mnemba (AI) yake maarufu, Gemini, moja kwa moja ndani ya kivinjari chake cha Chrome. Tangazo hili lilitolewa kupitia chapisho la blogu la kampuni hiyo mnamo tarehe 18 Septemba.
Kwa kuanzia, huduma hii mpya itawafikia watumiaji nchini Marekani wanaotumia kompyuta za Mac na Windows, pamoja na wale wanaotumia vifaa vya mkononi. Habari njema zaidi kwa watumiaji ni kwamba maboresho haya hayatohitaji malipo yoyote ya ziada au usajili wa kulipia; yatakuwa sehemu ya matumizi ya kawaida ya Chrome.
Ujio wa Gemini ndani ya Chrome unalenga kurahisisha na kuharakisha utendaji kazi wa mtumiaji. Kwa mfano, mtumiaji ataweza kuiomba Gemini imueleze kwa muhtasari maudhui ya ukurasa wa wavuti alioufungua, kufanya kazi zinazohusisha kurasa (tabs) nyingi kwa wakati mmoja, na hata kupanga ratiba ya mikutano au kutafuta video kwenye YouTube bila kuhama kutoka ukurasa alipo.
Kinachofanya ujio huu kuwa wa kipekee ni muunganiko wa kina wa Gemini na programu nyingine za Google kama vile Kalenda, Ramani (Maps), na YouTube. Hii inamaanisha mtumiaji hatohitaji tena kufungua kurasa mpya ili kutumia huduma hizi; ataweza kuzifikia moja kwa moja kupitia Gemini. Kwenye kompyuta, kwa mfano, itakuwa rahisi kutumia Gemini kulinganisha bidhaa kutoka tovuti tofauti zilizofunguliwa, kutengeneza muhtasari wa habari kutoka vyanzo mbalimbali, au hata kutafuta ukurasa fulani kwenye historia ya kivinjari chako.
Hatua hii ya Google inakuja wakati ambapo ushindani katika ulimwengu wa akili mnemba umepamba moto, huku makampuni hasimu kama OpenAI na Anthropic nayo yakizindua vivinjari vyenye uwezo wa AI.
Google pia imefunua maono yake ya baadaye kwa Gemini ndani ya Chrome. Kampuni inapanga kuipa akili mnemba hiyo uwezo wa kumsaidia mtumiaji kufanya "kazi za kila siku" kama vile kuagiza bidhaa za matumizi ya nyumbani, kupanga ratiba za usafirishaji wa mizigo, na hata kuweka nafasi (booking) kwenye saluni au migahawa.
Hata hivyo, ili kuhakikisha usalama wa mtumiaji, Google imeweka wazi kuwa kwa kazi zenye "hatari kubwa" au zile "zisizoweza kubadilishwa" baada ya kufanyika, kutakuwa na utaratibu wa mtumiaji kuthibitisha kwanza kabla ya Gemini kutekeleza agizo.