Takwimu kutoka Hospitali ya Taifa Muhimbili (MNH) zinaonesha kuwa asilimia 7 ya watu nchini Tanzania wanakabiliwa na ugonjwa sugu wa figo, huku idadi ya wagonjwa wanaohitaji huduma ya uchujaji wa damu (dialysis) ikiongezeka kwa kasi katika kipindi cha miaka michache iliyopita.
Kwa mujibu wa Bingwa wa Magonjwa ya Figo kutoka MNH, Dk. Jonathan Mngumi, wagonjwa waliokuwa wakihitaji huduma ya dialysis wameongezeka kutoka 380 kati ya mwaka 2014-2016 hadi 2,900 mwaka 2021-2022, na sasa idadi hiyo imefikia 3,500.
Dk. Mngumi alitoa takwimu hizo leo alipokuwa akitoa elimu kuhusu ugonjwa wa figo na magonjwa yasiyoambukiza kwa walimu wakuu wa shule za sekondari jijini Dar es Salaam pamoja na maafisa wa Chuo cha Taaluma ya Polisi (DPA), ikiwa ni sehemu ya maadhimisho ya Siku ya Figo Duniani.
Ugonjwa wa Figo Waathiri Nguvu Kazi ya Taifa
Dk. Mngumi alieleza kuwa ugonjwa wa figo unawaathiri zaidi watu wenye umri wa kati ya miaka 40 hadi 50, kundi ambalo ni sehemu muhimu ya nguvu kazi ya taifa. Ongezeko hili linaonesha changamoto kubwa katika sekta ya afya, kwani linahitaji rasilimali nyingi kwa ajili ya matibabu na huduma za uchujaji wa damu.
"Tunahitaji kuelimisha jamii kuhusu umuhimu wa kulinda afya ya figo mapema, kwani magonjwa sugu ya figo ni tishio kubwa kwa afya na ustawi wa jamii," alisema Dk. Mngumi.
Kwa upande wake, Dk. Faraja Chiwanga, ambaye ni Mkurugenzi wa Huduma za Tiba MNH, alisisitiza kuwa lengo la maadhimisho ya Siku ya Figo Duniani ni kuelimisha wananchi kuhusu umuhimu wa kinga dhidi ya magonjwa ya figo.
"Tunatarajia walimu hawa watafikisha elimu hii kwa wanafunzi wao, jambo litakalosaidia kujenga msingi wa afya bora ya figo tangu wakiwa vijana," alisema Dk. Faraja.
Polisi na Walimu Kuwa Mabalozi wa Afya ya Figo
Katika kikao hicho, Kamishna Msaidizi Mwandamizi wa Polisi (SACP) Ralph Meela pamoja na Mwenyekiti wa Wakuu wa Shule za Sekondari, Dk. Mavumba Hussein, waliushukuru uongozi wa MNH kwa kutoa elimu hiyo muhimu.
Walisema kuwa watakuwa mabalozi wa kuhamasisha jamii kuhusu afya ya figo katika maeneo yao ya kazi na familia zao.
Kaulimbiu ya maadhimisho ya mwaka huu ni:
"JE, FIGO YAKO IKO SALAMA? Tutambue mapema, ilinde afya ya figo yako."
Hii ni fursa kwa kila mtu kuchukua tahadhari za kiafya kwa kula mlo bora, kufanya mazoezi, kuepuka matumizi ya pombe na sigara, pamoja na kufuatilia afya zao mara kwa mara ili kuepuka hatari ya magonjwa ya figo.