DOHA – Rais wa Jamhuri ya Kidemokrasia ya Congo (DRC), Felix Tshisekedi, na Rais wa Rwanda, Paul Kagame, wamekutana ana kwa ana mjini Doha, Qatar, kwa mazungumzo kuhusu mgogoro unaoendelea mashariki mwa DRC. Mazungumzo hayo yalifanyika jana kwa lengo la kutafuta suluhu ya kudumu kwa hali ya sintofahamu kati ya mataifa hayo mawili jirani.
Kwa mujibu wa taarifa iliyotolewa na Qatar, ambayo ilifanya upatanishi katika mkutano huo, viongozi hao wawili walikubaliana kutoa wito wa kusitishwa mara moja kwa mapigano katika eneo hilo bila masharti yoyote.
Hata hivyo, licha ya hatua hiyo ya kidiplomasia, serikali ya DRC bado inaituhumu Rwanda kwa kuhusika katika kupeleka silaha na kusaidia wanamgambo wanaosababisha machafuko katika eneo la mashariki mwa Congo. Kwa miongo kadhaa, eneo hilo limekumbwa na ghasia kutokana na makundi ya waasi yanayoshutumiana kwa mashambulizi dhidi ya raia na vikosi vya serikali.
Mazungumzo kati ya viongozi hao yanakuja wakati ambapo jumuiya ya kimataifa inaendelea kushinikiza upatikane mwafaka wa kudumu ili kumaliza mzozo huo ambao umeathiri maelfu ya watu, huku wakimbizi wengi wakilazimika kuyakimbia makazi yao.
Qatar imeeleza dhamira yake ya kuendelea kusaidia juhudi za upatanishi ili kuhakikisha amani inarejea katika ukanda huo. Hata hivyo, bado haijafahamika iwapo makubaliano haya yatatekelezwa kwa vitendo, ikizingatiwa historia ya migogoro ya muda mrefu kati ya DRC na Rwanda.