Rais wa Marekani, Donald Trump, ameendelea kutikisa meza za uongozi duniani kwa kutoa kauli nzito zinazoashiria mabadiliko makubwa ya kiuchumi na kijeshi. Katika kikao kizito cha Baraza la Mawaziri kilichofanyika Ikulu ya White House hapo jana, Trump ameweka wazi kuwa "anamsuka upya" mfumo wa fedha wa taifa hilo kwa kupanga kumtangaza mrithi wa Mwenyekiti wa Benki Kuu ya Marekani (Federal Reserve - Fed) mapema mwaka 2026, huku akitishia kupeleka moto wa kijeshi katika ardhi za kigeni kupambana na wauza dawa za kulevya.
Siku za Jerome Powell Zinahesabika
Trump, ambaye amekuwa haivi chungu kimoja na Mwenyekiti wa sasa wa Fed, Jerome Powell, ameweka wazi kuwa anasubiri kwa hamu muda wa Powell uishe ili aweke "mtu wake." Powell amekuwa akilaumiwa na Trump kwa kuweka riba za juu ambazo zinabana uchumi, jambo ambalo Trump aliliita "hujuma" wakati wa kampeni.
"Nitamtangaza mtu mpya, pengine mapema mwakani 2026," alisema Trump kwa kujiamini. Ingawa hakutaka kusema moja kwa moja, ishara zote zinaonyesha kuwa Kevin Hassett, Mkurugenzi wa Baraza la Uchumi la Taifa (NEC), ndiye kipenzi cha Rais.
Katika tukio la kukabidhi msaada kutoka kwa bilionea Michael Dell (mwanzilishi wa kompyuta za Dell), Trump alimnyooshea kidole Hassett na kusema kwa utani uliomeza ukweli: "Huyu hapa anaweza kuwa Mwenyekiti mtarajiwa wa Fed... Ninasema anaweza, lakini ni mtu anayeheshimika sana." Hassett mwenyewe ameshaonyesha utayari wa kuvaa viatu hivyo vizito vinavyoamua thamani ya Dola duniani, akisema yuko tayari kutumika akiteuliwa.
Vita ya 'Unga': Trump Ataka Kuingia Msituni
Hali ya hewa ilichafuka zaidi pale mjadala ulipohamia kwenye usalama wa taifa na vita dhidi ya dawa za kulevya. Trump amedai kuwa operesheni za kijeshi za majini alizozianzisha katika Bahari ya Caribbean na Pasifiki Mashariki zimefanikiwa kuzamisha meli nyingi za wauza unga na kupunguza vifo vya watumiaji wa dawa za kulevya Marekani.
Lakini sasa anataka zaidi. Trump ametangaza nia ya kuanzisha "Mashambulizi ya Ardhini" (Ground Attacks) ndani ya nchi za Venezuela na pengine Colombia. Hii ni kauli nzito kidiplomasia kwani inamaanisha kutuma majeshi au ndege za kivita kushambulia nchi huru.
"Tunawapiga angani na majini ndio maana unga umepungua, sasa tunaanza kuwapiga ardhini pia," alisisitiza Trump kwa ukali. "Ardhini ni rahisi zaidi. Tunajua njia zao (cartels), tunajua viwanda vyao vilipo."
Trump aliongeza kuwa hatasita kushambulia nchi yoyote, ikiwemo Colombia (ambayo ni mshirika wa Marekani), ikiwa itabainika kuwa wana viwanda vya kutengeneza Cocaine au Fentanyl vinavyosafirisha sumu hiyo kuua Wamarekani. "Kama wanatuuzia kokeni, wao ni shabaha halali ya kijeshi," alionya.
Jeshi Ndani ya Mji: New Orleans Chini ya Ulinzi
Mbali na vita vya nje, Trump amegeukia usalama wa ndani. Ametangaza kuwa ndani ya wiki chache zijazo, atatuma Jeshi la Ulinzi wa Taifa (National Guard) katika mji wa New Orleans, jimbo la Louisiana, ili kusaidia kudhibiti uhalifu uliokithiri.
Hatua hii imekuja baada ya Gavana wa jimbo hilo, Jeff Landry (Mrepublican), kumuomba Rais msaada. Hii ni tofauti na majiji mengine yanayoongozwa na Wademokrat kama Chicago na Portland ambayo yamekuwa yakigoma kupokea msaada wa kijeshi wa Trump, yakihofia "kijeshi" mitaani.
Maamuzi haya ya Trump yanazidi kuibua mjadala mkali, huku wachambuzi wa kimataifa wakijiuliza ikiwa dunia iko tayari kwa "Marekani Mpya" inayotumia nguvu zaidi za kijeshi kutatua changamoto za kiuchumi na kijamii. Kwa sasa, macho yote yako kwa Jerome Powell anayemaliza muda wake Mei 2026, na viongozi wa Amerika Kusini wanaotafakari tishio la mabomu katika ardhi zao.