Rais wa Marekani, Donald Trump, ameagiza mashambulizi makubwa dhidi ya waasi wa Kihouthi nchini Yemen, hatua inayojulikana kuwa operesheni kubwa zaidi ya kijeshi nje ya nchi tangu alipochukua tena madaraka mnamo Januari 20.
Kupitia ujumbe aliouchapisha kwenye mtandao wa kijamii wa Truth Social mnamo Machi 15, Trump alisema kuwa ameamuru jeshi la Marekani kushambulia waasi wa Houthi, akiwaita "magaidi," na kusisitiza kuwa hatua hiyo inalenga kuleta suluhisho la haraka na la kudumu.
Trump alieleza kuwa mashambulizi hayo yanawalenga viongozi wa waasi na kambi zao za kijeshi. "Tutatumia nguvu kubwa na hatari hadi tufikie malengo yetu," alionya, akiwataka waasi wa Houthi kusitisha mara moja mashambulizi yao dhidi ya meli za Marekani. Aliendelea kusema, "Ikiwa hawatasitisha, wataona mateso ambayo hawajawahi kushuhudia hapo awali."
Pamoja na mashambulizi hayo, Trump alituma onyo kali kwa Iran, akitaka ikomeshe msaada wake kwa waasi wa Houthi. Alisema kuwa ikiwa Iran itaendelea kuhatarisha usalama wa Wamarekani au taasisi za Marekani, itabeba dhima kamili ya matokeo yatakayotokea.
Mashambulizi haya yanajiri siku chache baada ya Houthi kutangaza kurejelea mashambulizi dhidi ya meli za Israel kama njia ya kushinikiza kuingizwa kwa misaada ya kibinadamu katika Ukanda wa Gaza. Waasi hao wamekuwa wakishambulia meli zinazopita katika Bahari Nyekundu tangu kuzuka kwa vita kati ya Israel na Hamas mnamo Oktoba 2023.
Kwa mujibu wa taarifa za vyombo vya habari vya kimataifa kama Reuters na AP, mashambulizi ya Marekani yaliwalenga waasi katika mji mkuu wa Yemen, Sanaa. Wizara ya Afya ya Yemen, inayoongozwa na waasi wa Houthi, iliripoti kuwa watu tisa wameuawa na wengine tisa kujeruhiwa kufuatia mashambulizi hayo. Kituo cha televisheni cha Al-Masirah, kinachoendeshwa na waasi wa Houthi, kiliripoti kuwa mashambulizi hayo yalihusisha mabomu kadhaa yaliyorushwa katika maeneo ya Al-Jaraf kaskazini mwa Sanaa na Shubuh upande wa mashariki.
Mashuhuda wameripoti kuona milipuko mikubwa katika ghala za silaha na roketi pamoja na makazi ya viongozi wa Houthi. Picha zinazosambaa mtandaoni zinaonyesha moshi mzito ukifuka karibu na uwanja wa ndege wa Sanaa, eneo ambalo linadaiwa kuwa na miundombinu ya kijeshi.
Kwa upande wao, waasi wa Houthi wamesisitiza kuwa hawawezi kuachia mashambulizi haya bila kujibu. "Tutajibu kwa kiwango kilekile cha mashambulizi haya. Tuko tayari kwa mapambano zaidi," walitangaza kupitia kituo cha Al-Masirah.
Tangu Oktoba 2023, waasi wa Houthi wamefanya zaidi ya mashambulizi 100 dhidi ya meli za biashara katika Bahari Nyekundu na Ghuba ya Aden, wakidai kuunga mkono Palestina. Mashambulizi hayo yamesababisha uharibifu mkubwa, ikiwemo kuzama kwa meli mbili na vifo vya mabaharia wanne. Marekani na washirika wake wameahidi kuendelea na operesheni za kijeshi ili kulinda usalama wa njia za bahari katika eneo hilo.