Vikosi vya Marekani vimeripotiwa kufanya mashambulizi mengine ya anga katika mji wa Saada, kaskazini mwa Yemen, hapo jana, yakilenga makazi ya watu na eneo la biashara la nishati ya jua. Kwa mujibu wa timu za uokoaji za eneo hilo, shambulio hilo limesababisha vifo vya watu wasiopungua mmoja na kujeruhi wengine wanne.
Shirika la habari la AFP na Shirika la Habari la China (Xinhua) vimeripoti kuwa idadi hiyo ya majeruhi ni ya awali, na inaweza kuongezeka kutokana na kazi inayoendelea ya timu za ulinzi wa raia kuzima moto uliozuka katika eneo hilo na kutafuta wahanga zaidi.
Mashambulizi hayo ya hapo jana yalilenga maeneo mbalimbali katika eneo la Hafshin, magharibi mwa mji wa Saada, ambao ni mji mkuu wa Mkoa wa Saada.
Siku tano kabla ya tukio hili, kundi la Houthi lilikanusha madai ya serikali ya Marekani kwamba vikosi vya Marekani vilishambulia mkutano wa viongozi wa kundi hilo katika mji wa bandari wa Hodeida, ulioko kwenye Bahari Nyekundu.
Televisheni ya Al-Masirah, inayoendeshwa na Houthi, ilirusha taarifa kutoka kwa serikali ya Houthi ikipinga madai hayo, ikisema kwamba "mkutano huo unaodaiwa na Marekani haukuwa mkutano wa kijeshi, bali ulikuwa moja ya mikusanyiko ya sherehe za raia zinazoonekana kote Yemen wakati wa Sikukuu ya Eid."
Marekani ilianza tena mashambulizi ya anga nchini Yemen mnamo Machi 15, yakilenga mji mkuu Sanaa na Mkoa wa Saada kaskazini, pamoja na maeneo mengine nchini. Marekani inadai kuwa operesheni hiyo inalenga kudhoofisha uwezo wa kijeshi wa kundi la Houthi.
Katika kipindi cha wiki mbili zilizopita, vikosi vya Marekani vimeendelea na mashambulizi makali ya anga yakilenga mifumo ya ulinzi wa anga ya Houthi, makao makuu ya uongozi, maeneo muhimu ya kijeshi, na ghala za silaha zilizosambazwa katika mikoa mbalimbali.
Kabla ya hapo, kundi la Houthi lilianza tena mashambulizi dhidi ya meli za kiraia zinazohusika na Israel na manowari za kijeshi zinazopita katika Bahari Nyekundu na Ghuba ya Aden. Kundi hilo lilisema kuwa hatua hiyo inatokana na Israel kuzuia uingizaji wa misaada ya kibinadamu katika Ukanda wa Gaza.
Houthi imedai kuwa operesheni zake za kijeshi baharini zinalenga kuonyesha mshikamano na Wapalestina katika Ukanda wa Gaza na kushinikiza jeshi la Israel kupunguza operesheni zake za kijeshi katika eneo hilo.
Chanzo cha picha : Xinhua