Kando ya Mkutano wa Mpango wa Mattei kwa Afrika na ‘EU Global Gateway’ uliofanyika Roma, Italia, Waziri wa Mambo ya Nje na Ushirikiano wa Afrika Mashariki, Balozi Mahmoud Thabit Kombo, alikutana na Waziri wa Ulinzi wa Tanzania, Dkt. Stergomena Tax, ambaye alikuwa ziarani kikazi nchini humo. Katika mkutano huo, Tanzania na Italia zilitia saini Hati ya Ushirikiano katika masuala ya ulinzi.
Viongozi hao kwa pamoja walifanya kikao kilichohudhuriwa na watumishi wa wizara zao, wafanyakazi wa Ubalozi wa Tanzania nchini Italia, pamoja na wawakilishi wa Watanzania wanaoishi Italia (Diaspora). Katika kikao hicho, walijadili mambo mbalimbali yanayohusu ushirikiano baina ya nchi hizo mbili, hususan katika sekta ya ulinzi.
Ushirikiano huu unatarajiwa kuimarisha uhusiano kati ya Tanzania na Italia katika masuala ya kijeshi, kubadilishana uzoefu na utaalamu, pamoja na kushirikiana katika masuala ya usalama wa kimataifa. Hati hii inaashiria hatua muhimu katika kuimarisha diplomasia ya ulinzi kati ya nchi hizo mbili.