Janga kubwa la asili limeikumba tena nchi ya Afghanistan, ambapo tetemeko kubwa la ardhi lenye ukubwa wa 6.0 limepiga eneo la mashariki mwa nchi hiyo na kusababisha vifo vya takriban watu 800 na kujeruhi wengine zaidi ya 2,500. Vyombo vya habari vya kimataifa, vikiwemo Aljazeera, vinaripoti kuwa idadi ya vifo inahofiwa kuongezeka kutokana na ugumu wa shughuli za uokoaji na hali mbaya ya miundombinu katika maeneo yaliyoathirika.
Tetemeko hilo lilitokea usiku wa manane wa Agosti 31, majira ya saa 11:46 usiku, likiathiri zaidi majimbo ya Nangarhar na Kunar, ambayo yanapatikana karibu na mpaka wa Pakistan. Mamlaka ya Taliban inayoongoza nchi hiyo imeeleza kuwa mtikisiko huo ulikuwa na nguvu kiasi cha kubomoa maelfu ya nyumba, na kuwaacha wakaazi wengi wakiwa wamefukiwa chini ya vifusi.
Ripoti zinaonyesha kuwa idadi kubwa ya vifo imesababishwa na ujenzi duni wa makazi katika maeneo hayo ya vijijini, ambapo nyumba nyingi zimejengwa kwa kutumia udongo na vifaa hafifu visivyoweza kuhimili mitikisiko mikali. Hali hii imesababisha hasara kubwa, huku wahasiriwa wengi wakitajwa kuwa ni wanawake na watoto ambao walikuwa wamelala wakati maafa yalipotokea.
Nguvu ya tetemeko hilo ilisikika mamia ya kilomita kutoka eneo la tukio. Shirika la utangazaji la Uingereza (BBC) limesema kuwa mitikisiko ilitikisa majengo katika mji mkuu wa Afghanistan, Kabul, ulio umbali wa kilomita 120, na hata katika mji mkuu wa Pakistan, Islamabad, ulio umbali wa kilomita 250.
Juhudi za uokoaji zinaendelea, huku timu za madaktari na waokoaji zikitumwa kutoka maeneo mbalimbali ya nchi. Mashirika ya kimataifa kama Umoja wa Mataifa (UN) na Chama cha Msalaba Mwekundu pia yameanza kutoa msaada. Hata hivyo, kadiri muda unavyosonga, ndivyo idadi ya vifo na majeruhi inavyozidi kuongezeka.
Hili ni pigo jingine kwa Afghanistan, ambayo mwezi Oktoba mwaka 2023 ilikumbwa na tetemeko jingine la ukubwa wa 6.3 katika jimbo la Herat magharibi mwa nchi, na kusababisha vifo vya watu zaidi ya 2,000.