Vatican, Roma – Wakati Wakristo kote duniani, ikiwemo Tanzania, wakijumuika kusherehekea kuzaliwa kwa Masiha, Kiongozi wa Kanisa Katoliki Duniani, Papa Leo XIV, ametoa ujumbe mzito uliojaa simanzi na matumaini, akiwataka wababe wa vita duniani kuweka silaha chini angalau kwa saa 24 ili kuheshimu siku hii takatifu.
Hii ni Krismasi ya kwanza kwa Baba Mtakatifu huyo tangu aliposimikwa rasmi mwezi Mei mwaka huu (2025), kufuatia kifo cha mtangulizi wake, Papa Francis, aliyefariki dunia mwezi Aprili. Akizungumza kutoka katika makazi yake ya mapumziko yaliyopo Castel Gandolfo, nje kidogo ya Jiji la Roma, Papa Leo XIV hakuweza kuficha masikitiko yake juu ya hali ya hatari inayoendelea kugharimu maisha ya watu wasio na hatia.
"Moyo Wangu Unavuja Damu"
Katika mkutano wake na waandishi wa habari uliofanyika Desemba 23, Papa alionyesha kukerwa na kitendo cha Serikali ya Russia kukataa ombi la kusimamisha vita nchini Ukraine wakati wa sikukuu.
"Inasikitisha sana kuona kuwa ombi la kusitisha mapigano kwa ajili ya Krismasi limekataliwa na upande wa Russia. Hili limenipa huzuni kubwa moyoni mwangu," alisema Papa huyo kwa sauti ya chini iliyojaa uchungu. Aliongeza kuwa, "Ninawasihi wale wote wenye mapenzi mema, heshimumuni siku hii. Hata kama hamtaki amani ya kudumu, basi tupeni angalau saa 24 za utulivu ili dunia ipumue."
Kauli hii inakuja wakati ambapo mazungumzo ya amani kati ya Russia na Ukraine yamegonga mwamba, huku kila upande ukionyesha "shingo ngumu" katika kufikia muafaka.
Simu Maalumu Kwenda Gaza
Akigeukia mgogoro wa Mashariki ya Kati, Papa Leo XIV ametoa wito kwa Israeli na kundi la Hamas kuharakisha utekelezaji wa awamu ya pili ya makubaliano ya kusitisha mapigano. Hali katika Ukanda wa Gaza bado ni tete, huku makubaliano ya awali yakiripotiwa kukiukwa mara kwa mara.
Ili kuwapa moyo waumini walioko vitani, Papa alibainisha kuwa amefanya mazungumzo kwa njia ya simu na Paroko wa Kanisa la Holy Family lililopo Gaza, Padri Gabriel Romanelli. Kanisa hilo ndilo kimbilio pekee la Wakatoliki katika eneo hilo ambalo limegeuka kuwa uwanja wa vita tangu Oktoba 2023.
"Nimezungumza na Padri Romanelli, hali ni ngumu lakini imani yao ni kubwa. Ni faraja kusikia kuwa tarehe 21 Desemba, kwa mara ya kwanza tangu vita vianze, Patriaki wa Yerusalemu aliweza kuongoza Misa ya Krismasi katika eneo hilo. Hii ni ishara kuwa mwanga unaweza kupenya gizani," alisisitiza kiongozi huyo.
Dunia Inasubiri 'Urbi et Orbi'
Leo, tarehe 25 Desemba, macho na masikio ya dunia yanaelekezwa katika Uwanja wa Mtakatifu Petro mjini Vatican, ambapo Papa Leo XIV anatarajiwa kutoa ujumbe wake rasmi wa Krismasi na baraka ya "Urbi et Orbi" (Kwa Mji na kwa Ulimwengu).
Wadadisi wa mambo ya kidiplomasia wanatabiri kuwa ujumbe wa mwaka huu utajikita zaidi katika "Diplomasia ya Huruma", ukirejea nyayo za mtangulizi wake, Hayati Papa Francis, ambaye katika Krismasi yake ya mwisho mwaka 2024 alipaza sauti vikali kulaani biashara ya silaha na ukosefu wa utu.
Kwa Tanzania, ambayo inajivunia tunu ya amani na utulivu, ujumbe huu wa Papa ni ukumbusho muhimu wa kulinda mshikamano uliopo, huku dunia ikishuhudia mataifa makubwa yakiparurana. Vita hivi siyo tu vinauwa watu, bali vimekuwa na athari za moja kwa moja kiuchumi hata kwa nchi za Afrika kupitia kupanda kwa bei za nishati na chakula.