Kiongozi Mkuu wa Kanisa Katoliki duniani, Papa Leo XIV, ametoa onyo zito na la kihistoria akilaani vikali kuongezeka kwa matumizi ya Akili Mnemba (AI) katika nyanja za kijeshi, akitaja hatua hiyo kuwa ni janga linalozidisha machungu ya vita duniani. Katika ujumbe wake wa kwanza kuelekea 'Siku ya Amani Duniani' uliotolewa Desemba 18, 2025, kiongozi huyo ameweka wazi kuwa kukabidhi maamuzi ya uhai na kifo kwa mashine ni sawa na kuingamiza misingi ya ubinadamu.
Papa Leo XIV, ambaye tangu kuchaguliwa kwake Mei mwaka huu amekuwa sauti kuu ya maadili katika teknolojia, ameeleza masikitiko yake juu ya jinsi droni zinazojiendesha (autonomous drones) na mifumo ya makombora inayotumia algoritmi za utabiri inavyozidi kushika kasi. Kwa mujibu wa Papa, kuwepo kwa teknolojia hizi kunawapa viongozi wa kisiasa na kijeshi mwanya wa kukwepa kuwajibika kwa damu ya binadamu inayomwagika, jambo aliloliita kuwa ni "usaliti mkubwa na wa hovyo" kwa misingi ya kisheria na kifalsafa inayolinda ustaarabu wetu.
"Tunashuhudia maamuzi ya nani aishi na nani afe yakihamishiwa kwa mashine. Huu ni usaliti wa hali ya juu kwa utu wetu," alieleza Papa katika ujumbe huo uliosambazwa na shirika la habari la AFP. Alisisitiza kuwa ingawa maendeleo ya kisayansi yana faida zake, hususan katika nyanja kama udaktari, matumizi yake katika uwanja wa vita yanatishia kuifuta taswira ya ubinadamu na kuifanya dunia kuwa mahali pa kutisha zaidi.
Hata hivyo, Papa hakuishia kwenye teknolojia pekee. Alirusha kombora la maneno kwa viongozi wanaotumia dini kama ngao ya kufanikisha malengo yao ya kisiasa na kitaifa. Amekosoa vikali tabia ya kuhalalisha ghasia, vita, na chuki kwa kutumia jina la Mungu, akibainisha kuwa imani inapaswa kuwa daraja la amani na si chombo cha kuchochea mapigano ya silaha au utaifa uliopitiliza.
Kuhusu suala la silaha za nyuklia, Papa Leo XIV ameponda dhana ya "kuzuia shambulio kwa kutisha" (nuclear deterrence). Amesema kuwa amani inayotegemea hofu ya maangamizi siyo amani ya kweli bali ni "mantiki ya kichaa" inayokiuka misingi ya haki na uaminifu kati ya mataifa. Aliongeza kuwa ni jambo la kusikitisha kuona mataifa yakichukulia kutojiandaa kwa vita au kutolipiza kisasi kama udhaifu, wakati kiuhalisia huo ndio ushujaa wa kweli unaohitajika kuinusuru dunia.
Ujumbe huu wa Papa unakuja wakati dunia ikikabiliwa na mivutano mikubwa ya kijiopolitika, na unalenga kuwakumbusha wanadamu kuwa "amani haijengwi kwa chuma na algoritmi, bali kwa moyo na udugu." Kanisa Katoliki huadhimisha Siku ya Amani Duniani kila Januari 1, na ujumbe huu ni mwongozo kwa waumini na watu wenye mapenzi mema duniani kote kutafakari mustakabali wa usalama wa mwanadamu katika karne hii ya kidijitali.