Taifa la Ujerumani linashuhudia mjadala mzito wa kijamii na kisiasa kufuatia takwimu mpya zinazoonyesha kuwa zaidi ya raia 22,000 wamebadilisha jinsia zao kisheria tangu kuanzishwa kwa sheria mpya inayorahisisha mchakato huo.
Kwa mujibu wa ripoti ya jarida la 'Stern' la nchini humo, likinukuu data rasmi kutoka Ofisi ya Shirikisho ya Takwimu, sheria hiyo mpya ijulikanayo kama 'Sheria ya Kujiamulia Jinsia' (Self-Determination Act) imeleta ongezeko la ghafla la watu wanaojitokeza kubadili jinsia zao zilizosajiliwa.
Sheria hiyo ilianza kutumika mwezi Novemba mwaka jana. Katika kipindi cha miezi tisa tu (hadi Julai mwaka huu), idadi ya watu waliokamilisha mchakato huo imevuka 22,000. Hili ni ongezeko kubwa la zaidi ya mara 30 ikilinganishwa na kipindi cha kabla ya sheria hiyo. Takwimu zinaonyesha kuwa katika miezi kumi ya mwanzo ya mwaka jana (Januari hadi Oktoba), kabla sheria haijaanza, ni watu 596 pekee waliokuwa wamebadilisha jinsia zao kisheria.
Takwimu za awali, hasa za miezi miwili ya mwanzo tangu sheria hiyo kuanza, zinaonyesha kuwa asilimia 45 (45%) ya waliobadilisha walitoka jinsia ya kike kwenda ya kiume, huku asilimia 33 (33%) wakitoka jinsia ya kiume kwenda ya kike.
Sababu ya Ujerumani kutunga sheria hii mpya ni kwamba utaratibu wa zamani ulionekana kuwa mgumu na wa kudhalilisha. Hapo awali, mtu aliyetafuta mabadiliko ya jinsia alilazimika kupitia mchakato mrefu wa kupata tathmini ya kina ya kisaikolojia na kisha kupata uamuzi wa mahakama. Wanaharakati walisema mchakato huu ulikuwa unakiuka haki za binadamu, hasa kwa watu wa jamii ya waliobadili jinsia (transgender).
Sheria mpya inarahisisha mambo; mtu anahitaji tu kutoa tamko (self-declaration). Chini ya sheria hiyo, raia anaweza kuchagua kusajiliwa kama 'mwanaume', 'mwanamke', 'jinsia tofauti' (diverse), au 'bila kipengele' (no entry).
Hata hivyo, sheria hii imeleta utata na madhara yasiyotarajiwa. Mfano mmoja uliotikisa nchi ni pale mwanasiasa mmoja wa mrengo mkali wa kulia, ambaye anajulikana kwa matamshi yake ya chuki dhidi ya makundi ya LGBTQ, alipoamua kubadilisha jinsia yake kisheria na kuwa 'mwanamke' muda mfupi tu kabla ya kuhukumiwa kwenda jela. Hali hii ilizua mjadala mkali kuhusu iwapo mfungwa huyo anapaswa kupelekwa kwenye gereza la wanawake au la.
Kisiasa, sheria hii ilipitishwa na serikali iliyopita ya mseto ya 'taa za barabarani' (iliyojumuisha vyama vya SPD na Kijani). Serikali ya sasa ya mrengo wa kati-kulia, inayoongozwa na Kansela Friedrich Merz (Chama cha CDU), ilikuwa imeahidi wakati wa kampeni za uchaguzi mkuu mapema mwaka huu kwamba itaibadilisha sheria hiyo.
Lakini, baada ya kuingia madarakani na kuunda serikali ya mseto na chama cha SPD mwezi Mei, serikali ya Merz imelainisha msimamo wake. Kwa sasa, wamekubaliana kuiacha sheria hiyo iendelee kutumika hadi Julai mwaka ujao, huku wakifanya tathmini ya kina kuhusu athari zake kwa watoto, vijana balehe, na wanawake, kabla ya kuamua hatima yake.