Msiba mkubwa wa angani umetokea nchini India baada ya ndege ya shirika la Air India, iliyokuwa imebeba watu 242 na kuelekea London, Uingereza, kuanguka dakika chache tu baada ya kuruka kutoka Uwanja wa Ndege wa Ahmedabad, mkoani Gujarat, magharibi mwa India, mnamo Juni 12. Ingawa idadi rasmi ya vifo bado haijatangazwa, tukio hili limetikisa taifa, huku chanzo cha ajali hiyo kikiwa bado hakijafahamika.
Shirika la habari la AFP limeripoti kuwa ndege hiyo, aina ya Boeing 787-8 Dreamliner yenye namba ya safari AI 171, ilianguka ghafla punde tu baada ya kuinuka angani. Eneo ilimotua ndege hiyo limegubikwa na hali ya taharuki na maafa makubwa. Imeelezwa kuwa ndege hiyo iliangukia katika eneo lenye shughuli nyingi, kati ya Hospitali ya Umma ya Ahmedabad na kambi ya makazi ya Goda, iliyo nje kidogo ya eneo la uwanja wa ndege, na kusababisha majengo kadhaa kuwaka moto.
Afisa mmoja mwandamizi wa polisi, akinukuliwa na Shirika la Habari la Reuters, amethibitisha kuwa "jengo lililoangukiwa ni hospitali. Takriban asilimia 70 hadi 80 ya eneo hilo tayari limekwisha fanyiwa usafishaji na asilimia iliyobaki itasafishwa hivi karibuni." Ahmedabad, mji mkuu wa Jimbo la Gujarat, ni jiji lenye wakazi wapatao milioni 8, na maeneo yanayozunguka uwanja wa ndege yana msongamano mkubwa wa watu.
Mashuhuda wameeleza picha za kutisha za ajali hiyo. Mkaazi mmoja alisimulia: "Ofisi yetu iko karibu na jengo lililoangukiwa na ndege. Tulishuhudia watu waliokuwa ndani ya jengo wakiruka kutoka ghorofa ya pili na ya tatu. Ndege yenyewe ilikuwa imeteketea kwa moto." Maneno haya yanaelezea wazi ukubwa wa janga lililotokea.
Katika ndege hiyo walikuwemo marubani wawili na wahudumu wa kabati kumi, na jumla ya watu 242. Air India imetoa orodha ya uraia wa abiria, ikionesha kuwa 169 walikuwa Wahindi, 53 Waingereza, 7 Wareno, na mmoja Mkanada.
Viongozi mbalimbali wa dunia wametoa pole kufuatia ajali hii. Waziri Mkuu wa India, Narendra Modi, alielezea ajali hiyo kama "yenye kuvunja moyo isiyoelezeka kwa maneno." Naye Waziri Mkuu wa Uingereza, Keir Starmer, kupitia taarifa yake, alisema eneo la tukio ni "la kuhuzunisha" na kutoa faraja kwa abiria na familia zao wanaopitia kipindi kigumu sana. Shirika la ndege lenyewe pia liliita ajali hiyo "ajali ya kutisha."
Kufuatia ajali hiyo, uwanja wa ndege umefungwa na safari zote za ndege zimesitishwa "hadi hapo taarifa nyingine itakapotolewa."
Kwa mujibu wa CNN, ajali hii ni ya kwanza kubwa kuwahi kutokea kwa ndege aina ya Boeing 787 Dreamliner tangu ianze kufanya kazi mwaka 2011. Boeing inabainisha kuwa kuna zaidi ya ndege 1,175 za Dreamliner zinazofanya kazi duniani kote, zikifanya safari 2,100 kila siku. Mchambuzi wa masuala ya anga, Geoffrey Thomas, aliliambia CNN kwamba "walikuwa wakiadhimisha hivi karibuni kufikisha abiria bilioni moja."
Baada ya kuchunguza video inayoonesha ndege ikishuka kabla ya kugonga ardhi, Thomas alieleza kuwa "haikuonekana kuwa katika hali ya hatari" bali "ilianguka tu na kugonga ardhi, na kuteketea kwa moto."
India imekumbwa na ajali kadhaa za ndege hapo awali, ikiwemo ile ya mwaka 1996 ambapo ndege mbili ziligongana angani juu ya New Delhi na kuua takriban watu 350. Mwaka 2010, ndege ya Air India Express ilianguka katika Uwanja wa Ndege wa Mangalore, kusini-magharibi mwa India, na kuteketea, na kusababisha vifo vya watu 158 kati ya 166 waliokuwemo. Pia, mnamo Juni 1985, ndege ya Air India Boeing 747 iliyokuwa ikisafiri kutoka Montreal kwenda London ilianguka baharini karibu na Ireland, na kuua abiria wote 329.