Mlipuko mkubwa umetokea katika kiwanda kimoja cha kutengeneza dawa, kilichopo katika jimbo la Telangana, kusini mwa India, na kusababisha maafa makubwa ambapo watu wasiopungua 12 wamepoteza maisha huku wengine 35 wakijeruhiwa. Tukio hili la kusikitisha limerejea tena maswali kuhusu usalama wa wafanyakazi katika viwanda vya kemikali na dawa nchini humo.
Ajali hiyo ilitokea mnamo Juni 30 (saa za huko) katika eneo la viwanda lililoko umbali wa takriban kilomita 50 kutoka mji wa Hyderabad, jimbo la Telangana. Habari zilizotolewa na mashirika ya habari kama AP na DPA, pamoja na gazeti la India Express, zimeeleza kuwa mlipuko huo ulifuatiwa na moto mkubwa ulioteketeza seheani za kiwanda hicho.
Miongoni mwa waliofariki, 10 waliripotiwa kushindwa kutoka nje ya jengo la kiwanda baada ya moto kuzuka, na hivyo kukumbana na mauti. Wengine wawili walifariki hospitalini kutokana na majeraha mabaya ya moto waliyoyapata. Baadhi ya majeruhi wanaripotiwa kuwa katika hali mbaya kiafya, jambo linalotia hofu kuhusu idadi ya vifo kuongezeka.
Hadi sasa, chanzo kamili cha mlipuko huo bado hakijajulikana rasmi, ingawa vyombo vya habari vya ndani vinasema kuwa inashukiwa kuwa mlipuko huo ulisababishwa na 'reactors' za kemikali (vyombo maalum vya kuchanganya kemikali) ndani ya kiwanda. Mkurugenzi wa Idara ya Zima Moto ya Telangana amethibitisha kuwa mlipuko ulitokea katika kitengo cha kukaushia dawa (spray dryer facility), akieleza kuwa ajali hiyo ilitokea wakati wa mchakato wa kusaga malighafi na kuzigeuza kuwa unga laini unaotumika katika utengenezaji wa dawa.
Timu za uokoaji bado zinaendelea na kazi ya kuondoa vifusi na kutafuta miili au majeruhi wengine ambao huenda wamefukiwa na mabaki ya jengo lililolipuka. Kiwanda hicho kinamilikiwa na kampuni ya India inayojihusisha na utengenezaji wa malighafi za dawa na mchanganyiko wa vitamini na madini.
India inafahamika kuwa na mkusanyiko mkubwa wa makampuni ya kimataifa ya dawa, na matukio yanayohusiana na mlipuko wa 'chemical reactors' si jambo geni nchini humo. Kwa mfano, mwezi Agosti mwaka jana, ajali kama hiyo ilitokea katika kiwanda cha dawa katika jimbo la Andhra Pradesh, kusini mwa nchi hiyo, na kuua watu 17 na kujeruhi wengine 35. Matukio haya yanaendelea kuibua wasiwasi juu ya umuhimu wa usalama na utekelezaji wa kanuni kali za viwandani ili kuzuia maafa kama haya kutokea tena.