Emma Heming Willis, mke wa nyota maarufu wa filamu za Hollywood, Bruce Willis, amefunguka kuhusu uamuzi mgumu aliouchukua wa kumhamishia mumewe kwenye makazi tofauti, mbali na nyumba yao ya familia, ili aweze kupata utulivu na uangalizi maalum anapoendelea kupambana na ugonjwa wa ‘dementia’.
Katika mahojiano ya hivi karibuni na kituo cha habari cha ABC nchini Marekani, Emma (47) alieleza kuwa hatua hiyo ilikuwa ni "mojawapo ya maamuzi magumu zaidi" kuwahi kuyafanya maishani mwake. Alisema ilibidi amhamishie Bruce (70) kwenye "nyumba ya pili" iliyo karibu na makazi yao ili kuwalinda binti zao wawili wadogo, wenye umri wa miaka 13 na 11.
"Nilijua kwamba, juu ya yote, Bruce angependa nifanye hivyo kwa ajili ya binti zetu," alisema Emma, akifafanua kuwa hali ya mumewe ilikuwa inamfanya ashindwe kustahimili kelele na mazingira yenye shughuli nyingi yanayotokana na watoto wadogo. Aliongeza kuwa ilikuwa vigumu hata kwa mabinti zao kuwaalika marafiki zao nyumbani, na alihofia kuwa wazazi wengine wasingekuwa na amani kuwaacha watoto wao katika mazingira hayo. Hivyo, aliamua "kuitenga familia nzima" ili kumpa mumewe utulivu na kuwapa watoto uhuru wao.
Licha ya kuishi katika nyumba tofauti, Emma alisisitiza kuwa upendo na mshikamano wa familia bado upo imara. Alieleza kuwa yeye humtembelea mumewe kila asubuhi na jioni, na binti zao pia hutumia muda mwingi naye mara kwa mara. Hii inahakikisha kuwa bado wanajisikia kama familia moja.
Bruce Willis, anayefahamika kwa filamu nyingi maarufu kama mfululizo wa "Die Hard," alistaafu uigizaji baada ya kugundulika kuwa na tatizo la kupoteza uwezo wa kuongea (aphasia). Mnamo Februari 2023, familia yake ilitangaza rasmi kuwa amegundulika na ugonjwa wa ‘Frontotemporal Dementia’ (FTD). Huu ni aina ya ugonjwa wa kusahau unaoathiri sehemu za mbele za ubongo, na kusababisha mabadiliko katika tabia, utu, na kupoteza uwezo wa lugha.
Kuhusu hali yake ya sasa, Emma alisema, "Bado ana uwezo wa kutembea na kwa ujumla ana afya njema. Tatizo ni kwamba ubongo wake ndio unadorora." Aliongeza, "Uwezo wake wa kuongea umepotea, lakini tumejifunza kuendana na hali hiyo na tumetafuta njia mpya za kuwasiliana."
Bruce Willis pia ana watoto wengine watatu wakubwa kutoka kwenye ndoa yake ya awali na mwigizaji Demi Moore, ambao sasa ni watu wazima.