Hali ya wasiwasi na mtafaruku wa kisiasa imeikumba Marekani kufuatia mauaji ya mwanaharakati maarufu wa mrengo wa kulia, Charlie Kirk, aliyepigwa risasi na kufariki wakati akihutubia mkutano wa hadhara chuoni. Sasa, taifa hilo linajiandaa kwa tukio kubwa la misa ya kumkumbuka, huku vikosi vya usalama vikiwa vimeimarisha ulinzi kufikia kiwango cha juu kabisa kutokana na hofu ya mashambulizi zaidi ya kigaidi.
Tukio hilo la kumbukumbu, linalotarajiwa kufanyika katika uwanja wa michezo wa State Farm huko Glendale, Arizona, linakadiriwa kuvuta umati wa watu takriban 100,000. Uwanja huo, ambao ni nyumbani kwa timu ya mpira wa miguu ya Arizona Cardinals, una uwezo wa kuchukua watu 63,000, hivyo waandaaji kutoka taasisi ya Kirk iitwayo ‘Turning Point USA’ wameandaa eneo la ziada katika uwanja jirani wa ‘Desert Diamond Arena’ ili kuhakikisha wote watakaofika wanapata nafasi.
Kutokana na uzito wa tukio hili na mgawanyiko mkubwa wa kisiasa uliopo nchini, Idara ya Usalama wa Taifa ya Marekani (Homeland Security) imelitangaza tukio hili kuwa la kiwango cha juu cha hatari kiusalama. Hii inamaanisha ulinzi utakaotumika unalingana na ule wa matukio makubwa zaidi nchini humo kama vile fainali za ligi ya taifa ya mpira wa miguu (Super Bowl) au mbio za kimataifa za New York Marathon.
Hofu hii inatokana na vitisho kadhaa vilivyotolewa mitandaoni vikilenga kufanya mashambulizi ya kigaidi na mauaji wakati wa ibada hiyo. Hii ni kwa sababu tukio litahudhuriwa na viongozi wazito wa serikali, wakiongozwa na Rais Donald Trump na Makamu wake, JD Vance, pamoja na maafisa wengine wa ngazi za juu kutoka serikali kuu na majimbo. Shirika la habari la ABC, likinukuu nyaraka za kiuchunguzi, limeripoti kuwa vyombo vya dola vinafuatilia "vitisho kadhaa ambavyo havijathibitishwa" vinavyoashiria kuwa watu wenye itikadi kali au washambuliaji binafsi wanaweza kulenga misa hiyo.
Tayari, dalili za hatari zimeanza kuonekana baada ya Idara ya Usalama wa Rais (Secret Service) kumkamata mwanaume mmoja aliyekuwa amejihami kwa bunduki na kisu ndani ya uwanja wa State Farm, eneo ambalo misa itafanyika. Tukio hilo limethibitisha kuwa vitisho vilivyotolewa si vya kubeza, na vimeongeza shinikizo kwa vikosi vya usalama kuhakikisha kila anayehudhuria anakuwa salama.