Rais wa Marekani, Donald Trump, amechukua hatua isiyo ya kawaida kwa kutumia sheria ya kale ya mwaka 1798, inayojulikana kama Alien Enemies Act (AEA), kuwafukuza watu wanaohusiana na genge la Tren de Aragua kutoka Venezuela. Hii ni mara ya kwanza tangu Vita vya Pili vya Dunia kwa sheria hii kutumiwa.
AEA inampa rais mamlaka makubwa ya kufukuza raia wa nchi adui bila kuwapa fursa ya kusikilizwa mahakamani wakati wa vita. Trump alitumia sheria hii kwa kuwatangaza wanachama wa genge hilo kama "maadui wa Marekani."
Hata hivyo, ndani ya saa chache baada ya agizo hilo kutolewa, Jaji James Boasberg wa Mahakama ya Shirikisho ya Washington, D.C. alitoa uamuzi wa kulisimamisha kwa muda wa wiki mbili. Alisema kuwa mahakama inahitaji muda wa kusikiliza kesi iliyowasilishwa na raia watano wa Venezuela waliokuwa wakitarajiwa kufukuzwa.
Jaji Boasberg alisisitiza kuwa ikiwa ndege iliyowabeba watu hao ilikuwa bado haijatua nchini mwao, basi hatua zote zinapaswa kuchukuliwa kuhakikisha wanarudishwa Marekani. Wakati wa uamuzi huo, ndege hizo mbili zilikuwa tayari karibu kufika kwenye maeneo yao ya kutua.
Hatua ya Trump imesababisha mjadala mkubwa, kwani sheria ya AEA awali ilitumika tu katika nyakati za vita – Vita vya 1812, Vita vya Kwanza vya Dunia, na Vita vya Pili vya Dunia. Wakati wa Vita vya Pili vya Dunia, sheria hii ilitumika kuwakamata na kuwafunga Wajerumani, Waitaliano, na Wajapani waliokuwa Marekani.
Trump amedai kuwa genge la Tren de Aragua linahatarisha usalama wa taifa na limekuwa likifanya "vita haramu" dhidi ya Marekani. Genge hilo linajulikana kwa ulanguzi wa dawa za kulevya na vurugu, na mwezi uliopita, Wizara ya Mambo ya Nje ya Marekani liliorodhesha kundi hilo miongoni mwa magenge hatari ya kimataifa, sambamba na magenge ya Mexico.
Hata hivyo, wakosoaji wanasema kuwa Trump anatumia sheria hiyo kwa njia isiyo halali ili kukwepa taratibu za kawaida za uhamiaji. Serikali yake tayari ilikuwa imefikia makubaliano na El Salvador kuwakamata wanachama 300 wa genge hilo kwa mwaka mmoja.
Mahakama inatarajiwa kutoa uamuzi wa mwisho kuhusu uhalali wa agizo hili ndani ya siku 14 zijazo.